काठमाडौं । अमेरिकामा नेपाली नर्स ममता काफ्लेको हत्या गरेको अभियोगमा उनका श्रीमान् नरेश भट्ट दोषी ठहर भएका छन् । भर्जिनियाको अदालतमा करिब ६ हप्तासम्म चलेको सुनुवाइपछि जुरीले भट्टलाई प्रथम श्रेणीको हत्या तथा शवको अपमान र लुकाएको अभियोगमा दोषी ठहर गरेको हो ।
मंगलबार आएको फैसलाअघि अदालतमा बयान दिँदै भट्टले ममताको शव टुक्राटुक्रा पारेको र फ्याँकेको स्वीकार गरेका थिए । तर, उनले हत्या भने आफूले नगरेको दाबी गर्दै ममताको शव शंकास्पद अवस्थामा फेला परेको बताएका थिए ।
अभियोजन पक्षले भट्टको बयानलाई बनावटी भन्दै जुरीसमक्ष उनको कथामा विश्वास नगर्न आग्रह गरेको थियो । सहायक कमनवेल्थ महान्यायाधिवक्ता सारा सामीले भट्टले ममताको हत्या गरी शव टुक्राटुक्रा पारेर भर्जिनियाको लुरेस्थित ल्यान्डफिलमा फ्याँकेको जिकिर गरेकी थिइन् ।
जुलाई २०२४ मा मानासस पार्कस्थित आफ्नै घरबाट बेपत्ता भएकी ममताको शव अहिलेसम्म फेला परेको छैन । शव ल्यान्डफिलमा फ्याँकिएको अभियोजन पक्षको दाबी छ । यसका कारण परिवारले उनको अन्तिम संस्कारसमेत गर्न नपाएको अभियोजन पक्षले अदालतमा उल्लेख गरेको थियो ।
भट्टले अदालतमा ममताको शव मृत अवस्थामा फेला पारेपछि आफूलाई पोस्ट ट्रम्याटिक स्ट्रेस डिसअर्डर (पीटीएसडी) को असर परेको र मानसिक नियन्त्रण गुमाएको अवस्थामा शव टुक्राटुक्रा पारेको बयान दिएका थिए ।
यता, प्रतिरक्षा वकिल ट्रेसी लेनोक्सले घटनाबारे पर्याप्त तर्कसंगत शंका रहेको दाबी गर्दै अभियोजन पक्षले ममतामाथि दुर्व्यवहार भएको पुष्टि गर्न नसकेको जिकिर गरेकी थिइन् ।
प्रथम श्रेणीको हत्यामा दोषी ठहर भएपछि भट्टलाई कम्तीमा २० वर्षदेखि जन्मकैदसम्म सजाय हुन सक्नेछ । शवको अपमान तथा लुकाएको अभियोगमा थप पाँच वर्षसम्म सजाय हुन सक्ने व्यवस्था छ । उनलाई आगामी मार्चमा सजाय सुनाइनेछ ।
फैसलापछि अदालतबाहिर भेला भएका ममताका साथी तथा नेपाली समुदायका सदस्यहरूले फैसलाको स्वागत गरेका थिए ।
