काठमाडौँ । अवकाश पाउन एक महिनाभन्दा कम समय बाँकी रहेका प्रधानन्यायाधीश हरिकृष्ण कार्की इजलास बस्न छाडेका छन्। ६५ वर्षे उमेर हदका कारण साउन २० गतेदेखि अवकाश पाउन लागेका कार्कीले एक महिना अघिदेखि इजलास नबस्ने परम्परालाई निरन्तरता दिएका हुन्।
कार्कीले पछिल्लोपटक असार १३ गते संवैधानिक इजलासमा बसेर मुद्दाको सुनुवाइ गरेपछि आफूलाई इजलास तोकेका छैनन्। सर्वोच्चका प्रवक्ता विमल पौडेलले नियमित अवकाश पाउने अवधि एक महिना बाँकी भएकाले प्रधानन्यायाधीशले इजलासमा बसेर मुद्दाको छिनोफानो गर्न छाडेको जानकारी दिए। उनले भने, ‘अवकाशको एक महिना अघि १९ गतेदेखि नै उहाँले इजलास बस्न छाड्नु भएको छ।’
इजलास नबसेपछि साउन १९ गतेसम्म कार्कीले प्रशासनिक काम भने गरिरहने भएका छन्। उनी असार १ गते मात्रै प्रधानन्यायाधीश नियुक्त भएका थिए। न्याय परिषद सचिवालयले उनलाई प्रधानन्यायाधीश बन्नुअघि नै साउन २० गतेदेखि उमेर हदका कारण अवकास पाउने औपचारिक सूचना दिएको थियो। उनी २०७३ सालमा कानुन व्यवसायीबाट सर्वोच्चको न्यायाधीश नियुक्त भएका थिए।
