देउखुरी । लुम्बिनी प्रदेश सरकारले तीन अर्ब रुपैयाँ भन्दा बढी लागतमा बनाउन थालेको १० वटा मन्त्रालयको भवन निर्माणको काम तिब्र रुपमा अगाडि बढेको छ । मुख्यमन्त्री तथा मन्त्रिपरिषद् कार्यालयको परिसरभित्र नयाँ भवन बनिरहेका छन् । गत फागुन १० मा तत्कालीन मुख्यमन्त्री लीला गिरीले मन्त्रालय भवनको शिलान्यास गरेका थिए ।
काठमाण्डौंको शर्मा सगुन जेभीसँग ३ अर्ब ९ करोड १ लाख २९ हजार रुपैयाँमा भवन निर्माण सम्झौता भएको छ । तीन वर्षभित्र निर्माणकार्य पूरा गर्ने सम्झौतामा गरिएको छ । यसका लागि खानेपानी, ग्रामीण तथा शहरी विकास मन्त्रालय अन्तर्गत प्रदेश राजधानी निर्माण आयोजना कार्यान्वयन एकाइ खडा गरिएको छ ।
मन्त्रालयका भवनसंगै सात वटा अन्य योजना कार्यालयको भवन पनि बन्ने प्रक्रियामा रहेको प्रवक्ता पाण्डेयले बताए । यता प्रदेश सरकारले राप्ती उपत्यकालाई राजधानी शहरका रूपमा निर्माण अघि बढाउने बताएको छ ।
जसका लागि गुरुयोजना तयार गरिएको छ । यसमा २५ अर्ब लाग्ने अनुमान गरिएको छ । प्रदेश राजधानी शहर निर्माणका लागि पूर्वाधार विकास प्राधिकरणले गुरुयोजना बनाएको हो । राजधानी शहर बनाउन २५ अर्बको स्रोत सुनिश्चितता भएको र २० वर्षभित्र निर्माण कार्य सक्ने लक्ष्य रहेको सरकारका प्रबक्ता सन्तोष कुमार पाण्डेयले जनाए । गुरुयोजना अन्तर्गत नै मन्त्रालयका भवन निर्माण भइरहेका छन् । पाँच वर्षभित्र प्रदेश सँग जोडिएका प्रशासनिक कार्यालय, कर्मचारीका निवास, निर्देशनालय भवन निर्माण गरिने भएको छ।
राप्तीमा तीनवटा पक्की पुल, राप्तीका नदीका दुवैतिर तटबन्ध निर्माण गरिने बताईएकोे छ। साथै, राजधानीलाई जोड्न कलात्मक (सिक्नेचर) पुल बनाउने योजना समेटिएको छ भने ५० मिटर चौडा तीन वटा सडक निर्माण गरिने गुरुयोजनामा समेटिएको छ ।
