काठमाण्डौं । नक्कली शरणार्थी प्रकरणको अनुसन्धान तातेसँगै तीन ठूला दलका प्रमुख नेताहरु तारन्तर बैठक बस्न थालेका छन् । जनमानसमा उनीहरु यो विषयलाई यत्तिकै सामसुम पार्ने रणनीति बुन्दै छन् कि भन्ने आशंका बढ्दो छ । जनताको यही आशंकालाई आज एमाले उपाध्यक्ष सुवास नेम्वाङले नेताहरुसमक्ष राखे । प्रधानमन्त्री तथा माओवादी अध्यक्ष पुष्पकमल दाहाल ‘प्रचण्ड’, कांग्रेस सभापति शेरबहादुर देउवा र एमाले अध्यक्ष केपी शर्मा ओलीबीच आज भेटवार्ता भएको थियो ।
उनीहरुले एक चरण कुरा गरेपछि तीनवटै दलका उपनेता र सचेतकहरूलाई पनि मिसाइयो । उक्त बैठकको प्रमुख विषयवस्तु संसदीय समितिको भागबन्डा र सत्यनिरुपण तथा मेलमिलाप आयोगसम्बन्धी अध्यादेश थियो । बैठकमा एमाले उपाध्यक्ष नेम्वाङले शरणार्थी प्रकरणको प्रसंग निकालेका थिए । उनले तीन दलका शीर्ष नेता बस्नासाथ जनतामा शंका उब्जिन थालेको भन्दै घोचपेच गरेका थिए ।
नेम्वाङले घुमाउरो ढंगले भने, ‘तपाईंहरु तीनजना नेता एक ठाउँमा बस्नासाथ शरणार्थीको कुरा गर्न बसे भन्छन् बाहिर । यो त गलत हो । यस्तो कुरा नहुनुपर्ने । हाम्रो संसदीय लोकतन्त्रमा तपाईंहरु नबस्दा पो समस्या हो त ।’ नेम्वाङलाई जवाफ दिँदै तीनैजना नेताहरुले शरणार्थी प्रकरणमा प्रहरीले गरेको कारवाहीमा हस्तक्षेप गर्ने आफूहरुको मनशाय नरहेको प्रष्ट पारे ।
‘हामी तीनै दल यो विषयलाई संविधान कानूनबमोजिम निष्कर्षमा पुर्याउनुपर्छ भन्नेमा छौं । यसमा हामी एक छौं । प्रहरीको कारबाहीमा हाम्रो सहयोग रहन्छ । यो कुरा तपाईहरुले बाहिर भन्दिए हुन्छ’, नेतात्रयको भनाइ उद्धृत गर्दै स्रोतले भन्यो ।
