काठमाडौं । नेपाली कांग्रेस लुम्बिनी प्रदेश कार्यसमितिका सभापति अमरसिंह पुनले संघीयता कार्यान्वयनमा ठोस प्रगति गर्न संघको अधिकार प्रदेशमा हस्तान्तरण गर्नुपर्नेमा जोड दिएका छन् ।

बुधबार बसेको कांग्रेस केन्द्रीय कार्यसमितिको तेस्रो दिनको बैठकमा आमन्त्रित सदस्यको हैसियतमा धारणा राख्दै उनले पार्टीले संघीयताको पूर्ण कार्यान्वयनका लागि अग्रसर भूमिका लिनुपर्ने बताए। “पार्टीको तर्फबाट संघीयतालाई पूर्ण रूपमा कार्यान्वयन गर्ने सम्बन्धमा संघको अधिकार प्रदेशमा हस्तान्तरण गर्न आवश्यक पहल कदमी लिन आवश्यक छ,” पुनले बैठकमा भने ।

उनले जनप्रतिनिधिहरूलाई पार्टीप्रति अझ उत्तरदायी र जवाफदेही बनाउन तहगत पार्टी संरचनालाई सरकार गठन, निर्देशन तथा मूल्यांकन गर्ने अधिकार दिनुपर्ने धारणा पनि व्यक्त गरे । राजनीतिक नियुक्तिमा पारदर्शिता र कार्यकर्ताको सम्मान आवश्यक रहेको उल्लेख गर्दै उनले भने, “मनोमानी तरिकाले मनोनयन तथा नियुक्तिले पार्टी संगठनमा लामो समयदेखि सक्रियता र योगदान दिइरहेका साथीहरूमा चरम निराशा र वितृष्णा आएको छ ।”

पुनले पार्टीको केन्द्रीय तथा प्रदेश विभागमा नियुक्ति गर्दा जिल्लाबाट सिफारिस भएको नामका आधारमा मनोनयन गर्न आग्रह गरे, जसले कार्यकर्तामा भरोसा र उत्साह पुनःस्थापित गर्न सहयोग पुग्ने उल्लेख गरे ।