काठमाडौं l नेपाली कांग्रेस केन्द्रीय समितिको मंगलबारको बैठक एक अभूतपूर्व क्षणको साक्षी बन्यो, जब केन्द्रीय सदस्य दिनेश कोइरालाको भावुक र सत्यभाषी मन्तव्यले सिंगो बैठक हल सन्नाटामा परिणत गर्यो । राजनीतिक जीवन, विगतका निर्णय, र पार्टीको भविष्यबारे दिनेशले प्रस्तुत गरेको धारणा अहिले कांग्रेस वृत्तमा चर्चाको केन्द्र बनेको छ ।
दिनेश कोइरालाले आफ्नो मन्तव्यको सुरुवात जीवनका पीडादायी क्षणहरूबाट गर्दै बताए, "जीवनमा चारपटक मात्र रोएको छु। आमा बित्दा, मेयरको टिकट खोसिँदा, रुखको सट्टा अरु चुनाव चिन्हमा भोट हाल्न पर्दा र पछिल्लोपटक देउवाजीले अन्याय भयो भनेर भन्नु भएको बेलामा।" उनको मन्तव्य भावनात्मक मात्र होइन, स्पष्ट राजनीतिक दृष्टिकोणयुक्त थियो ।
उनले पार्टी नेतृत्वलाई चुनौती दिँदै भने, “हामीले जसलाई समर्थन गर्यौं, उसैले धोका दियो। अब फेरि पनि त्यही गल्ती दोहोर्याउँदा कांग्रेस र देश दुबै संकटमा पर्छन्। माओवादीसँगको गठबन्धनले कांग्रेसको विचार, आत्मसम्मान र कार्यकर्ताको मनोबल क्षति पुर्याएको छ।”
चितवनको प्रसंग झिक्दै दिनेशले भने, “२०७४ मा मेरो उम्मेदवारी फिर्ता गराई माओवादीलाई सहयोग गरियो, जसको नतिजा धोका मात्र रह्यो। माओवादीले स्थानीय चुनावमा कांग्रेससँग सहयोग लिए पनि संसदीय चुनावमा एमालेसँग मिलेर सत्तामा पुगे।” विनोद चौधरीको नाम नलिएर दिनेशले उनीमाथि गम्भीर प्रश्न उठाए। “कति चन्दा दिनुभयो? कसलाई? पारदर्शिता किन छैन?” भन्दै उनले चौधरीको राजनीतिक शैलीको आलोचना गरे ।
चौधरी माइक तिर लम्किँदा हलभित्र हुटिङ भयो र उनी बोल्नै पाएनन्। दिनेशले भने, “शेखर कोइराला जस्तो उदार नेता संकीर्ण कसरी? फरक मत राख्नु संकीर्णता होइन।” पार्टीले गरेका कारबाहीप्रति पनि उनले प्रश्न उठाउँदै भने, “व्यक्तिले होइन, पार्टीले विवेक प्रयोग गर्नुपर्छ ।
गठबन्धनको विरोधमा उत्रिएका तर पार्टीको विरुद्ध उम्मेदवार नबनेका कार्यकर्तामाथिको कारबाही तत्काल फुकुवा हुनुपर्छ।” उनको अभिव्यक्तिपछि धेरै सदस्यले हात मिलाउँदै समर्थन जनाए। धेरैको भनाइ थियो, "दिनेशजीले पार्टीको अन्तरवेदनालाई आवाज दिएका छन् ।" बैठकमा सभापति शेरबहादुर देउवाले उनलाई रोक्ने प्रयास नगरेको, उल्टै १३ मिनेटसम्म uninterrupted बोल्न दिएको दृश्यले पनि बैठकको महत्वलाई संकेत गर्यो ।
"भाइलाई अन्याय भयो, तपाईंको भविष्य राम्रो छ" भन्ने देउवाको अभिव्यक्तिले दिनेशलाई चौथोपटक रुवाएको उनले बैठकमै बताए । अन्त्यमा दिनेशले स्पष्ट भने, “म पदको लागि राजनीति गर्दिनँ, रूख चिन्ह सुरक्षित राख्न र जिताउन राजनीतिमा छु। कांग्रेसले अब विवेकसाथ अगाडि बढ्नुपर्छ।” दिनेशको यो सम्बोधन कांग्रेसभित्रको असन्तुष्टि, विद्रोह र बदलिँदो राजनीतिक चेतनाको स्पष्ट प्रतिबिम्ब बनेको छ। कारबाहीको राजनीति अब सकिनुपर्छ भन्ने संकेत यस बैठकले दिएको छ ।
