काठमाडौँ । गृहमन्त्री रमेश लेखकले रसुवाको गोसाईकुण्ड गाउँपालिका–२ स्थित रसुवागढी क्षेत्रमा भोटेकोशी नदीमा आएको भीषण बाढीबाट ठूलो मानवीय र भौतिक क्षति भएको जानकारी दिनुभएको छ ।
प्रतिनिधिसभाको मंगलबारको बैठकमा बोल्दै गृहमन्त्री लेखकले हालसम्म नेपाल प्रहरीका २ जना, ११ जना नेपाली सर्वसाधारण र ६ जना चिनियाँ नागरिक गरी १९ जना बेपत्ता भएको जानकारी दिनुभयो। खोज तथा उद्धारका लागि नेपाली सेना, नेपाल प्रहरी र सशस्त्र प्रहरी गरी ६८२ सुरक्षाकर्मी परिचालन गरिएको छ ।
गृहमन्त्रीका अनुसार त्रिशुली नदी किनारमा विभिन्न स्थानमा शवहरू फेला परेका छन् भने भरतपुर २९ मा प्रहरी सहायक निरीक्षक लालबहादुर श्रेष्ठको शव भेटिएको छ। हालसम्म हवाई उद्धारमार्फत ३० जनाको उद्धार गरिएको छ भने भन्सार यार्डमा फसेका ९ जना र ड्याम साइडमा फसेका १८ जनाको सफल उद्धार भएको छ ।
बाढीका कारण नेपाल–चीन जोड्ने मितेरी पुल बगाएको र धुन्चेदेखि टिमुरेसम्मको सडक अवरुद्ध भएको बताउँदै गृहमन्त्री लेखकले २३ कन्टेनर ट्रक, ३५ विद्युत गाडी र ६ सिनो ट्रक बगाएको जानकारी दिनुभयो। रसुवागढी हाइड्रोपावरको ड्याम तथा त्रिशुली–३ परियोजना समेत बाढीले बगाएको छ ।
मन्त्री लेखकले प्रधानमन्त्री केपी शर्मा ओलीको नेतृत्वमा पीडित क्षेत्रको स्थलगत अवलोकन गरी राहत तथा उद्धार कार्यलाई थप प्रभावकारी बनाउन विपद् परिषद्को बैठकबाट निर्णयहरू गरिएका जानकारी दिनुभयो। बेपत्ता तथा घाइतेको खोज, राहत र निःशुल्क उपचारका लागि गृह तथा स्वास्थ्य मन्त्रालयलाई जिम्मेवारी तोकिएको छ ।
उहाँले चीन सरकारसँग समन्वय गरी मितेरी पुलको पुनर्निर्माण गर्न आग्रह गर्ने निर्णय भएको पनि जानकारी दिनुभयो। साथै, विपद् सूचना प्रणालीलाई प्रभावकारी बनाउन, विस्तृत क्षति मूल्याङ्कन प्रारम्भ गर्ने र वैकल्पिक सडक सञ्चालनको गृहकार्य अघि बढाइएको बताउनुभयो।
अन्त्यमा, गृहमन्त्री लेखकले सबै नागरिक, राजनीतिक दल र सरोकारवालाहरुलाई आपत्कालीन अवस्थामा सरकारको अभियानमा हातेमालो गर्न अपील गर्नुभयो ।
