ललितपुर । नेकपा (एमाले) को आगामी विधान महाधिवेशनको तयारी सन्दर्भमा आज ललितपुरको च्यासलस्थित तुलसीलाल स्मृति प्रतिष्ठानको सभाहलमा जनसंगठनहरूको विस्तारित भेला सम्पन्न भएको छ ।
भेलामा पार्टी अध्यक्ष केपी शर्मा ओलीसहित वरिष्ठ नेताहरूको उपस्थिति रहेको थियो। भेलाले संगठन सुदृढीकरण, विधान संशोधनका आवश्यक प्रस्तावहरू, जनसंगठनहरूका भूमिका र भावी रणनीतिबारे छलफल गरेको एमाले स्रोतले जनाएको छ ।
कार्यक्रममा पार्टीसँग आवद्ध विभिन्न २८ भन्दा बढी जनसंगठनका प्रतिनिधिहरूको उल्लेख्य सहभागिता रहेको थियो। उनीहरूले विधान महाधिवेशनलाई सफल बनाउने सन्दर्भमा आ–आफ्नो प्रतिबद्धता जनाएका थिए ।
भेलामा बोल्ने नेताहरूले जनसंगठनहरूलाई संगठनात्मक, विचारधारात्मक र व्यवहारिक दृष्टिले अझ सशक्त बनाउँदै लैजानुपर्नेमा जोड दिएका थिए। विधान महाधिवेशनमा केन्द्रीय विषय बनेका संरचना, नेतृत्व चयन प्रक्रिया, सदस्यता र अनुशासन सम्बन्धी धाराहरूमा सुझावहरू समेत प्रस्तुत गरिएको थियो ।
नेकपा (एमाले) ले छिट्टै केन्द्रीय समितिको बैठकमार्फत महाधिवेशनको मिति र कार्यतालिका सार्वजनिक गर्ने जनाएको छ ।
