काठमाडौं । उपप्रधानमन्त्री तथा अर्थमन्त्री विष्णुप्रसाद पौडेलले सरकारको बजेट र मौद्रिक नीतिले आगामी वर्षमा छ प्रतिशत आर्थिक वृद्धि हासिल गर्ने विश्वास व्यक्त गरेका छन्। उनले ऊर्जा, शिक्षा, स्वास्थ्य, कृषि, रोजगारी, उद्योगलगायत क्षेत्रलाई प्राथमिकतामा राखेर बजेट निर्माण गरिएको र यसले अर्थतन्त्रलाई चलायमान बनाउने दाबी गरे ।
लगानीमैत्री वातावरण बनाउन कानुनी तथा नीतिगत सुधार गरिएको उल्लेख गर्दै उनले भन्सार, निजीकरण, आर्थिक ऐनलगायत विभिन्न कानुन संशोधन भएको जानकारी दिए। आर्थिक सूचकमा सुधार भएको जनाउँदै उनले चालु आर्थिक वर्षमा ४.६१ प्रतिशत आर्थिक वृद्धि, विप्रेषण, विदेशी मुद्रा सञ्चिति तथा पुँजीगत खर्चमा उल्लेख्य वृद्धि भएको बताए ।
संसदीय अभ्यासमा प्रतिपक्षको भूमिका अपरिपक्व रहेको भन्दै पौडेलले तथ्य र तर्कमा आधारित विपक्षी भूमिका आवश्यक रहेको धारणा राखे। संविधान कार्यान्वयन सही दिशामा अघि बढेको भन्दै उनले बाँकी सुधार क्रमिक रूपमा अगाडि बढाइने स्पष्ट पारे। उनले संविधान परिष्कृत गर्न राजनीतिक सहमतिमा आधारित संशोधन आवश्यक रहेको बताए ।
संघीयतालाई संस्थागत गर्न सरकारले समन्वयात्मक ढंगले काम गरिरहेको जनाउँदै उनले कमजोरी सच्याउँदै अघि बढ्नुपर्ने बताए। सामाजिक सञ्जालमा पुरानो व्यवस्थाको पक्षपोषणलाई निराशाजनक भन्दै उनले लोकतान्त्रिक प्रणालीमाथि विश्वास गर्न आग्रह गरे। समग्रमा, सरकारको कामको मूल्याङ्कन जनताबाट हुने भन्दै उनले देशलाई समृद्धितर्फ लैजान सरकार प्रतिबद्ध रहेको जनाए ।
