काठमाडौं । कोरिया रिटर्नीहरुले आफूहरुलाई तुरुन्त रोजगारका लागि कोरिया पठाउन सरकारसमक्ष माग गरेका छन् । सोमबार काठमाडौंमा प्रदर्शन गर्दै उनीहरुले ईपिएसको नयाँ भाषा परीक्षा रोकेर आफूहरुलाई रोजगारका लागि पठाउन माग गरेका हुन् ।
उनीहरुले सरकारले कोरिया रिर्टनीहरुलाई विभेदकारी व्यवहार गरेको आरोप लगाए । प्रदर्शनपछि आयोजित पत्रकार सम्मेलनमा कोरिया रिर्टनीका संयोजक नविन कुमार राईले अहिले खुलाईएको भाषा परीक्षा तत्काल बन्द गरेर रिटर्नीहरुलाई पठाउनुपर्ने बताउनुभयो । आफूहरुले पहिला काम गरेको कम्पनीमा फाईल पठाउनका लागि पटक-पटक आग्रह गर्दा पनि सम्बन्धित निकायबाट सुनुवाई नभएको उहाँको भनाइ छ ।
उहाँले नयाँ भाषा परीक्षाको लागि खुलाइएको फर्मको सूचना तुरुन्त नहटाए एचआरडी नेपाल, वैदेशिक रोजगार विभाग र आवश्यक परे कोरियन दूतावास घेर्ने समेत चेतावनी दिनुभयो । राईले भाषा परीक्षमा सहभागी भएर, सम्पूर्ण प्रक्रियाहरु पूरा गरी कोरिया जाने अन्तिम चरणमा रहेपनि आफूहरुलाई रोजगारको प्रक्रियामा समावेश नगरिएको भन्दै आपत्ती जनाउनुभयो ।
त्यस्तै कोरिया रिटर्नी टेकबहादुर थापाले ईपिएस सिस्टममा आफूहरुलाई विभेद गरिएको बताउनुभयो ।
