पाँचथर । गएराति परेको अविरल वर्षाका कारण आएको भीषण बाढीले पाँचथर र ताप्लेजुङ क्षेत्रका विभिन्न जलविद्युत् आयोजना, खानेपानी तथा सिँचाइ पूर्वाधार र खेतीयोग्य जमिनमा ठुलो क्षति पुर्‍याएको छ। बाढीका कारण पाँचथर–ताप्लेजुङ सीमामा अवस्थित इंवाखोला जलविद्युत् आयोजनाको बाँध क्षेत्र (ड्याम साइट) को पर्खाल भत्किएको छ। यस्तै, याङवरक गाउँपालिका–२ मेवाखोलामा रहेको मेवाखोला जलविद्युत् आयोजनामा समेत बाढीले व्यापक क्षति पुर्‍याएको छ भने अरुण काबेली जलविद्युत् आयोजनामा पनि बाढीका कारण गम्भीर असर परेको प्रारम्भिक विवरण प्राप्त भएको छ।

बाढीले जलविद्युत् आयोजनाहरू मात्र नभई स्थानीयवासीको निजी सम्पत्ति र कृषिक्षेत्रमा पनि ठुलो नोक्सानी पुर्‍याएको छ। याङवरक–४ सिगेवाका स्थानीय बासिन्दा लालबहादुर माबो, लक्ष्मण माबो, योगेन्द्र माबो र छविलाल पोखरेलको अलैँची बगान तथा खेतीयोग्य जमिनमा बाढी पसेर बगाएपछि ठुलो आर्थिक क्षति भएको छ। यसैगरी, बाढीपहिरोका कारण सो क्षेत्रका महत्त्वपूर्ण सार्वजनिक पूर्वाधारहरू पनि ध्वस्त भएका छन्। प्रहरीका अनुसार टीकारामे, डल्लेढुङ्गा र सिगेवा खानेपानी योजना, वाराङ सिँचाइ योजना तथा मेची पहाडी खानेपानी योजनामा बाढीले व्यापक क्षति पुर्‍याएपछि स्थानीय क्षेत्रमा खानेपानी र सिँचाइको समस्या उत्पन्न भएको छ।