काठमाडौं। सरकारले हालसम्म देशका ४० लाख ३३ हजार ४० जना नागरिकलाई राष्ट्रिय परिचयपत्र वितरण गरेको छ। सरकारले हालै सार्वजनिक गरेको ‘आर्थिक सर्वेक्षण–२०८३’ अनुसार हालसम्म कुल ७५ लाख ८१ हजार १८३ थान परिचयपत्र कार्ड छपाई भइसकेका छन्, जसमध्ये उल्लेखित संख्यामा कार्ड नागरिकको हातमा पुगिसकेका हुन्।
यसैगरी, परिचयपत्र निर्माणका लागि विवरण सङ्कलन कार्य पनि तीव्र रूपमा अघि बढिरहेको छ। सर्वेक्षण प्रतिवेदनअनुसार वि.सं. २०८२ फागुन महिनासम्ममा २ करोड १३ हजार ५५३ जना नेपाली नागरिकको वैयक्तिक तथा जैविक (बायोमेट्रिक) विवरण सङ्कलन भइसकेको छ।
परिचयपत्रलाई बहुउपयोगी बनाउने उद्देश्यस्वरूप सरकारले यसको प्रणालीलाई अन्य महत्वपूर्ण सरकारी सेवाहरूसँग पनि जोडेको छ। जसअनुसार हालसम्म राष्ट्रिय परिचयपत्र प्रणालीलाई राहदानी विभाग, आन्तरिक राजस्व विभाग, निर्वाचन आयोग, सामाजिक सुरक्षा र कर्जा सूचना केन्द्र लगायत १२ वटा सरकारी तथा सार्वजनिक निकायका प्रणालीहरूसँग अन्तरआबद्ध (इन्टिग्रेट) गरिसकिएको छ।
