काठमाडौँ । सरकारले रिक्त रहेका विभिन्न देशका राजदूत तथा स्थायी प्रतिनिधि नियुक्तिका लागि खुला प्रतिस्पर्धामार्फत योग्य नेपाली नागरिकहरूबाट आवेदन माग गरेको छ। परराष्ट्र मन्त्रालयले बिहीबार कार्यविधि निर्माण गरी सुशासन (व्यवस्थापन तथा सञ्चालन) ऐन–२०६४ को दफा ४५ र राजदूत नियुक्ति निर्देशिका–२०७५ (२०७९ मा संशोधित) को अधीनमा रहेर यो आह्वान गरेको हो। हाल नेपालका १७ वटा कूटनीतिक नियोगहरू प्रमुखविहीन रहेको अवस्थामा खुला प्रतिस्पर्धाको माध्यमबाट भारत, चीन, अमेरिका, बेलायत, अष्ट्रेलिया, इजरायल, दक्षिण कोरिया, अष्ट्रिया, बहराइन, बङ्गलादेश, मलेसिया, ओमान र साउदी अरेबियालगायतका देशहरूमा नियुक्ति गरिने तयारी छ। नयाँ कार्यविधि अनुसार राजदूत पदलाई राजपत्राङ्कित विशिष्ट श्रेणीसरह मानिनेछ र यसको कार्यकाल कुल चार वर्षको हुने भए तापनि कुन उम्मेदवारलाई कुन देशमा पठाइने भन्ने विषय भने टीओआर (TOR) मा स्पष्ट खुलाइएको छैन।

यस गरिमामय पदका लागि आवेदकहरूले अन्तर्राष्ट्रिय सम्बन्ध, राजनीति शास्त्र, कानुन, अर्थशास्त्र, सार्वजनिक प्रशासन वा सोहीसँग सम्बन्धित विषयमा स्नातकोत्तर तह (Masters Degree) उत्तीर्ण गरेको हुनुपर्ने योग्यता तोकिएको छ। आवेदक कम्तीमा ३५ वर्ष उमेर पुगेको नेपाली नागरिक हुनुपर्ने, अंग्रेजी भाषामा राम्रो दक्खल भएको र कुनै पनि विदेशी मुलुकको स्थायी वा अस्थायी बसोबास सुविधा (पीआर/डीभी) नलिएको हुनुपर्नेछ। यसका साथै, भ्रष्टाचार वा नैतिक पतन देखिने फौजदारी अपराधमा दोषी ठहर नभएको, नेपाल सरकारको सेवाबाट बर्खास्त नगरिएको, वैदेशिक सहायता प्राप्त गैरसरकारी संस्थामा कार्यरत नरहेको, प्रस्तावित देशसँग कुनै पनि स्वार्थ नबाझिने र उच्च नैतिक चरित्र भएको हुनुपर्ने कडा मापदण्ड तय गरिएको छ। सम्बन्धित मुलुकको स्थानीय वा विशेष भाषा जान्ने उम्मेदवारलाई भने छनोट प्रक्रियामा थप लाभ (प्राथमिकता) मिल्ने परराष्ट्र मन्त्रालयले जनाएको छ।