काठमाडौं । विश्वकै अग्रणी राइड शेयरिङ प्लेटफर्म उबरले नेपालमा आफ्नो औपचारिक सेवा विस्तार गर्ने तयारी पूरा गरेको छ। कम्पनीले आगामी जेठ २२ गतेदेखि नेपालमा व्यावसायिक सेवा सुरु गर्ने घोषणा गर्दै सोही दिन विशेष पत्रकार सम्मेलनमार्फत आफ्नो रणनीति, सेवा संरचना र भावी योजनाबारे जानकारी दिने भएको छ। यससँगै नेपालमा डिजिटल यातायात सेवाको क्षेत्रमा अन्तर्राष्ट्रिय प्रतिस्पर्धा थप तीव्र हुने अपेक्षा गरिएको छ।
उबरको नेपाल प्रवेशलाई महत्व दिँदै कम्पनीका राइड्स एप्याकका उपाध्यक्ष तथा क्षेत्रीय महाप्रबन्धक डोमिनिक टेलर स्वयं काठमाडौं आउने कार्यक्रम तय गरिएको छ। नेपाललाई दक्षिण एसियाली बजार विस्तारको महत्वपूर्ण गन्तव्यका रूपमा हेरेको उबरले स्थानीय बजारमा सहज र प्रभावकारी सञ्चालनका लागि नेपाली राइड शेयरिङ कम्पनी ट्याक्सीमाण्डोसँग रणनीतिक साझेदारी गरेको छ।
सम्झौताअनुसार ट्याक्सीमाण्डोले नेपालमा उबरको ‘ब्याक–अफिस पार्टनर’का रूपमा काम गर्नेछ भने ट्याक्सीमाण्डोसँग आबद्ध चालकहरू स्वतः उबरको अन्तर्राष्ट्रिय नेटवर्कमा समेत आबद्ध हुनेछन्। यसले चालकहरूलाई थप यात्रु पहुँच र आम्दानीको अवसर प्रदान गर्ने विश्वास गरिएको छ। यसअघि ट्याक्सीमाण्डोले अन्तर्राष्ट्रिय राइड शेयरिङ कम्पनी यांगोलाई पनि यस्तै प्रकारको ब्याक–अफिस सेवा उपलब्ध गराउँदै आएको थियो।
नेपालमा उबरको प्रवेशलाई प्रविधिमैत्री यातायात सेवाको नयाँ अध्यायका रूपमा हेरिएको छ। यसले यात्रुहरूलाई थप विकल्प, सहज बुकिङ प्रणाली र अन्तर्राष्ट्रिय स्तरको सेवा अनुभव प्रदान गर्नुका साथै स्थानीय राइड शेयरिङ बजारमा प्रतिस्पर्धा र सेवा गुणस्तर दुवै बढाउने अपेक्षा गरिएको छ।
