काठमाडौं । पूर्व गृहमन्त्री सुधन गुरुङमाथि लगाइएका आरोपको छानबिन अन्तिम चरणमा पुगेका बेला सरकारले गठन गरेको जाँचबुझ समितिको कार्यावधि थप पाँच दिनका लागि बढाइएको छ। मंगलबारदेखि लागू हुने गरी म्याद थप गरिएको हो। यसअघि समितिलाई दिइएको १५ दिने समयसीमा सोमबार सकिएको थियो।
छानबिन समितिका अध्यक्ष तथा उच्च अदालतका पूर्वन्यायाधीश अच्युतप्रसाद भण्डारीका अनुसार गुरुङसँग आवश्यक बयान लिइसकिएको छ। बयानअघि समितिले उनीमाथि उठाइएका आरोपबारे सम्बन्धित निकाय तथा व्यक्तिसँग जानकारी संकलन गर्नुका साथै सम्पत्ति विवरणको अध्ययन र विश्लेषण गरेको जनाएको छ। थप प्रमाण, तथ्य र कागजातको परीक्षण बाँकी रहेकाले समितिलाई अतिरिक्त समय आवश्यक परेको बताइएको छ।
मन्त्रिपरिषद्को वैशाख २८ गतेको बैठकले भण्डारीको अध्यक्षतामा महालेखा नियन्त्रक शोभाकान्त पौडेल र सहन्यायाधिवक्ता अच्युतमणि नेउपाने सदस्य रहने गरी छानबिन समिति गठन गरेको थियो। व्यवसायी दीपक भट्टसँग साझेदारी गरेको तथा सम्पत्ति विवरणमा सेयर लुकाएको आरोप सार्वजनिक भएपछि गुरुङले गत वैशाख ९ गते गृहमन्त्री पदबाट राजीनामा दिएका थिए।
पूर्व गृहमन्त्रीमाथि लागेको आरोप राजनीतिक र प्रशासनिक दुवै दृष्टिले संवेदनशील मानिएकाले समितिको प्रतिवेदनलाई चासोका साथ हेरिएको छ। थपिएको समयभित्र समितिले आफ्नो निष्कर्षसहितको प्रतिवेदन सरकारलाई बुझाउने अपेक्षा गरिएको छ।
