काठमाडौँ । संसदको लोगो अंकित झण्डासहित विश्वको सर्वोच्च शिखर सगरमाथाको सफल आरोहण गरेका राष्ट्रिय स्वतन्त्र पार्टी (रास्वपा) का सांसद मिङ्मा ग्याबु शेर्पालाई विशेष समारोहबीच सम्मान गरिएको छ। मंगलबार सिंहदरबारमा आयोजित कार्यक्रममा सभामुख डोलप्रसाद अर्याल र राष्ट्रिय सभाका अध्यक्ष नारायणप्रसाद दाहालले उनलाई सम्मान गर्दै साहस, समर्पण र राष्ट्रिय गौरवको प्रतीकका रूपमा प्रशंसा गरेका हुन्।
हिमाल आरोहण क्षेत्रमा निरन्तर नयाँ कीर्तिमान स्थापित गर्दै आएका सांसद शेर्पाले सभामुखको अनुमतिमा संसदको झण्डा बोकेर गत जेठ १३ गते बिहान ५:४० बजे सगरमाथाको सफल आरोहण गरेका थिए। नेपालको संसदीय संस्थाको पहिचान विश्वको सर्वोच्च शिखरसम्म पुर्याउने उनको अभियानलाई ऐतिहासिक उपलब्धिका रूपमा हेरिएको छ।
आरोहणअघि सभामुख अर्यालले नै सांसद शेर्पालाई औपचारिक रूपमा बिदाइ गरेका थिए। सफल आरोहणपछि आयोजित सम्मान कार्यक्रममा संसदको प्रतिष्ठा, राष्ट्रिय गौरव र हिमाल आरोहण क्षेत्रमा नेपालको पहिचानलाई थप उचाइमा पुर्याउन शेर्पाले खेलेको भूमिकाको उच्च मूल्यांकन गरिएको थियो।
सगरमाथाको चुचुरोसम्म संसदको झण्डा फहराउँदै सांसद शेर्पाले नेपालको संसदीय लोकतन्त्र र राष्ट्रिय गौरवलाई विश्वसामु चिनाउने महत्वपूर्ण सन्देश दिएको बताइएको छ। उनको यो उपलब्धिलाई खेल, पर्यटन र राष्ट्रिय प्रतिष्ठासँग जोडिएको प्रेरणादायी उदाहरणका रूपमा समेत हेरिएको छ।
