काठमाडौं । प्रधानमन्त्री बालेन्द्र शाहको सीमा सम्बन्धी अभिव्यक्तिलाई लिएर विपक्षी दलहरूले संसद्मा चर्को विरोध जनाएपछि प्रतिनिधिसभा बैठक २५ गतेसम्मका लागि स्थगित भएको छ। बैठकमा निरन्तर अवरोध भएपछि सभामुख डोलप्रसाद अर्यालले अर्को बैठक २५ गते बस्ने गरी स्थगित भएको घोषणा गरेका हुन्।
बैठकका क्रममा विपक्षी दलका सांसदहरूले उठेर विरोध जनाउँदै सभामुखको आसनअगाडि रहेको बेल घेराउ गरेका थिए। नेपाली कांग्रेस, नेकपा एमाले, नेपाली कम्युनिस्ट पार्टी, श्रम संस्कृति पार्टी तथा राष्ट्रिय प्रजातन्त्र पार्टीका सांसदहरूले संयुक्त रूपमा विरोध प्रदर्शन गर्दै प्रधानमन्त्रीको अभिव्यक्तिप्रति आपत्ति जनाएका हुन्।
विपक्षी दलहरूको मुख्य माग प्रधानमन्त्री शाहले गत जेठ १७ गते प्रतिनिधिसभामा सांसदहरूसँगको प्रश्नोत्तर कार्यक्रममा दिएको ‘नेपालले भारतको सीमा मिचेको छ’ भन्ने अभिव्यक्तिबारे सार्वजनिक रूपमा माफी माग्नुपर्ने रहेको छ। उनीहरूले उक्त भनाइले राष्ट्रिय स्वाभिमान र नेपालको सार्वभौमिकतामाथि प्रश्न उठाएको आरोप लगाएका छन्।
संसद्मा जारी गतिरोधका कारण नियमित कार्यसूची प्रभावित बनेको छ भने राजनीतिक दलहरूबीचको टकराव थप तीव्र बनेको देखिएको छ। प्रधानमन्त्रीको अभिव्यक्तिलाई लिएर सत्ता र विपक्षबीच विवाद चर्किँदै जाँदा संसद्को अवरोध कहिले अन्त्य हुन्छ भन्ने विषय पनि चासोको केन्द्र बनेको छ।
