काठमाडौं । काठमाडौंको मनमैजु र टोखा क्षेत्रबाट राष्ट्रपति कार्यालयबाट चोरी भएका भनिएका हात्तीका दाह्रासहित पाँच जना पक्राउ परेका छन्। पक्राउ परेकाहरूबाट चार वटा हात्तीका दाह्रा बरामद भएपछि घटनाले नयाँ मोड लिएको छ।
प्रहरी स्रोतका अनुसार राष्ट्रपति कार्यालयको भित्तामा सजाइएका ती दाह्रा जेन–जी आन्दोलनका क्रममा भदौ २४ गते चोरी भएको प्रारम्भिक अनुसन्धानबाट खुलेको छ। यद्यपि, तथ्य तथा प्रमाण सङ्कलनको काम जारी रहेकाले यस विषयमा औपचारिक जानकारी दिन अझै समय लाग्ने प्रहरीले जनाएको छ।
पक्राउ पर्नेहरूमा राजीव महर्जन, टेकप्रसाद गुरुङ, पुरन बोहरा, आयुष महर्जन र सन्तबहादुर भुजेल रहेका छन्। तारकेश्वर नगरपालिका–९, मनमैजु निवासी राजीव महर्जनले वन्यजन्तुको अङ्ग अवैध रूपमा सञ्चय तथा बिक्री गरिरहेको सूचनाका आधारमा प्रहरीले छापा मारेको थियो।
छापामार कार्यवाहीका क्रममा महर्जनको घर नजिकैको खाली जग्गामा गाडेर राखिएको अवस्थामा दुई वटा हात्तीका दाह्रा बरामद गरिएको थियो। साथै, उनको कोठाबाट ‘Tramadol-50’ लेखिएको १५० क्याप्सुल समेत फेला परेको प्रहरीले जनाएको छ।
काठमाडौं उपत्यका अपराध अनुसन्धान कार्यालयका अनुसार घटनाको अनुसन्धानका क्रममा अन्य व्यक्तिहरूको संलग्नता पनि देखिएपछि थप चार जनालाई पक्राउ गरिएको हो। कार्यालयका एसपी शरतकुमार क्षेत्रीका अनुसार पक्राउ परेका सन्तबहादुर भुजेलको कोठाबाट झोलाभित्र लुकाइराखिएको अवस्थामा थप दुई वटा हात्तीका दाह्रा बरामद भएका छन्।
वन्यजन्तुको अङ्गको अवैध कारोबार र लागुऔषध सम्बन्धी गतिविधिमा संलग्न रहेको आशंकामा पक्राउ परेका उनीहरूमाथि लागुऔषध नियन्त्रण ऐन, २०३३ तथा राष्ट्रिय निकुञ्ज तथा वन्यजन्तु संरक्षण ऐन २०२९ बमोजिम थप अनुसन्धान र कानुनी कारबाही प्रक्रिया अघि बढाइएको प्रहरीले जनाएको छ।
