कपिलवस्तु । कपिलवस्तु नगरपालिका–१, मालटोलकी १६ वर्षीया रिया बर्माको विषालु सर्पको टोकाइबाट दुःखद निधन भएको छ। बुधबार मध्यराति घरमै सुतिरहेको अवस्थामा उनलाई विषालु सर्पले टोकेको बताइएको छ। घटनापछि परिवारजनले तत्कालै उनलाई उपचारका लागि कपिलवस्तु अस्पताल हुँदै गोरुसिंगे पुर्याएका थिए। तर चिकित्सकहरूको प्रयासका बाबजुद उपचारकै क्रममा उनको मृत्यु भएको हो।
हालै तौलेश्वरनाथ संस्कृत माध्यमिक विद्यालयबाट एसईई उत्तीर्ण गरेकी रिया बर्माले कक्षा ११ मा अध्ययन गर्ने र भविष्यमा केही गर्ने सपना देखेकी थिइन्। तर अचानक भएको यस घटनाले उनको सम्पूर्ण सपना अधुरै रहन पुगेको छ। सामाजिक सञ्जालमा उनीसँग सम्बन्धित एउटा पुरानो टिकटक पोस्टमा लेखिएको “Waiting for Death” अर्थात् “मृत्युको पर्खाइ” भन्ने शब्द र त्यसपछि भएको यो दुःखद निधनबीचको संयोगले परिवार, साथीभाइ तथा सामाजिक सञ्जाल प्रयोगकर्ताहरूलाई गहिरो भावुक बनाएको छ। परिवारमा अहिले गहिरो शोक छाएको छ भने स्थानीय समुदायले पनि घटनाप्रति दुःख व्यक्त गरेका छन्।
