काठमाडौँ । नेपाली कांग्रेस निकट नेपाल विद्यार्थी सङ्घ (नेविसंघ) ले प्रधानमन्त्री बालेन्द्र शाहको राजीनामा माग गर्दै राजधानीमा तीव्र विरोध प्रदर्शन गरेको छ । शुक्रबार राजधानीको ऐतिहासिक त्रिचन्द्र क्याम्पस परिसरमा भेला भएका नेविसंघ आबद्ध विद्यार्थीहरूले प्रधानमन्त्री शाहविरुद्ध चर्को नाराबाजी गर्दै सडक प्रदर्शन गरेका हुन् ।
संघीय संसद्को बैठकमा प्रधानमन्त्री शाहले नेपाल-भारत सीमा विवादको विषयलाई लिएर दिएको अभिव्यक्तिप्रति कडा आपत्ति जनाउँदै विद्यार्थीहरूले विरोधको बाटो रोजेका हुन् । प्रधानमन्त्रीले नेपालले पनि भारतीय सीमा मिचेको आशयको "गैरजिम्मेवार" अभिव्यक्ति दिएको भन्दै नेविसंघले यसलाई राष्ट्रहितविपरीत र कूटनीतिक मर्यादा बाहिरको कदम ठहर गरेको छ ।
त्रिचन्द्र क्याम्पस परिसरबाट सुरु भएको उक्त विरोध प्रदर्शनमा सहभागी विद्यार्थीहरूले देशको सार्वभौमसत्ता र भौगोलिक अखण्डता जस्तो संवेदनशील विषयमा हलुका टिप्पणी नगर्न चेतावनी दिएका छन् । उनीहरूले प्रधानमन्त्री शाहको कडा शब्दमा निन्दा गर्दै, देशको शिर निहुराउने अभिव्यक्ति दिने व्यक्ति कार्यकारी प्रमुखको कुर्सीमा बस्न अयोग्य भएको भन्दै तत्काल पदबाट राजीनामा दिनुपर्ने एकसूत्रीय माग अघि सारेका छन् ।
प्रधानमन्त्री शाहको उक्त संसद्ीय अभिव्यक्तिलाई लिएर केही दिनयता सडकदेखि सदनसम्म चौतर्फी विरोध भइरहेको छ । सीमा विवाद जस्तो संवेदनशील विषयमा कूटनीतिक अपरिपक्वता देखाएको भन्दै नेविसंघले प्रधानमन्त्रीले राजीनामा नदिएसम्म देशव्यापी आन्दोलन थप सशक्त बनाउने चेतावनी दिएको छ । प्रदर्शनका कारण केही समय त्रिचन्द्र क्याम्पस र घन्टाघर आसपासको सवारी आवागमन समेत प्रभावित बनेको थियो ।
