अर्घाखाँची l अर्घाखाँचीका प्रमुख जिल्ला अधिकारी तोय नारायण सुवेदीले जातीय भेदभाव तथा छुवाछुत सामाजिक रूपमा अनैतिक, अमानवीय मात्र नभई गम्भीर अपराधजन्य कार्य भएकाले यसको अन्त्यका लागि राज्य र समाज दुवैले प्रभावकारी भूमिका निर्वाह गर्नुपर्ने बताएका छन्।

राष्ट्रिय दलित पत्रकार संघ नेपाल, लुम्बिनी प्रदेश समितिको आयोजनामा २१औँ जातीय भेदभाव तथा छुवाछुत उन्मूलन राष्ट्रिय दिवस–२०८३ को अवसरमा सन्धिखर्क नगरपालिका–२ स्थित भगवती माध्यमिक विद्यालयमा आयोजित “सभ्य समाजको आधार : जातीय भेदभाव र छुवाछुतको बहिष्कार” विषयक वक्तृत्वकला प्रतियोगिताको उद्घाटन गर्दै प्रमुख जिल्ला अधिकारी सुवेदीले यस्तो धारणा व्यक्त गरेका हुन्।

उनले जातीय भेदभाव र छुवाछुतलाई सभ्य समाजमाथिको गम्भीर कलङ्कका रूपमा चित्रण गर्दै संविधानले सुनिश्चित गरेको समानता, न्याय र स्वतन्त्रताको अधिकार प्रत्येक नागरिकले व्यवहारमा अनुभूति गर्न पाउनुपर्ने बताए। समतामूलक र न्यायपूर्ण समाज निर्माणका लागि कानुनी व्यवस्थाको प्रभावकारी कार्यान्वयनसँगै सामाजिक चेतनाको विस्तार अपरिहार्य रहेको उनको भनाइ थियो।

कार्यक्रममा सन्धिखर्क नगरपालिकाका प्रमुख प्रशासकीय अधिकृत प्रमोद खनालले जातीय विभेद समाजको ठूलो विकृति भएको उल्लेख गर्दै यस्ता कार्यमा संलग्न व्यक्तिलाई कानुनी दायरामा ल्याउनुपर्नेमा जोड दिए। उनले विद्यालय, समुदाय तथा सामाजिक संघसंस्थाहरूले जनचेतनामूलक अभियान सञ्चालन गरी विभेदमुक्त समाज निर्माणमा योगदान पुर्‍याउनुपर्ने बताए।
त्यस्तै, भगवती माध्यमिक विद्यालयका प्रधानाध्यापक धुव्रबहादुर केसीले जातीय भेदभाव समाजको कलङ्क भएकाले यसको खुलेर विरोध गर्दै समानता र सामाजिक न्यायको पक्षमा सबै एकजुट हुनुपर्ने धारणा राखे।

वक्तृत्वकला प्रतियोगितामा १४ जना विद्यार्थीको सहभागिता रहेको थियो। प्रतियोगितामा लेनीन भट्टराई प्रथम, आयुष्मा पौडेल द्वितीय, शिशिर भट्टराई तृतीय तथा विपिन भट्टराई सान्त्वना स्थान हासिल गर्न सफल भएका थिए। विजेताहरूलाई नगद पुरस्कार, प्रमाणपत्र तथा सम्मान प्रदान गरिएको आयोजकले जनाएको छ।

कार्यक्रममा दलित अधिकारकर्मी विष्णु परियार, रामबहादुर परियार, सञ्जय नेपाली, विभिन्न सुरक्षा निकायका प्रमुख, मानवअधिकारकर्मी, नागरिक समाजका अगुवा, पत्रकार तथा सरोकारवालाहरूको उल्लेखनीय सहभागिता रहेको थियो।
लुम्बिनी प्रदेश समितिका सचिव अनिल नेपालीको अध्यक्षतामा सम्पन्न कार्यक्रमको सञ्चालन संघकी केन्द्रीय पार्षद कमला परियारले गरेकी थिइन्।

कार्यक्रममा वक्ताहरूले जातीय भेदभाव तथा छुवाछुतमुक्त समाज निर्माणका लागि कानुनी व्यवस्था मात्र पर्याप्त नहुने भन्दै सामाजिक रूपान्तरण, शिक्षा, चेतना र सामूहिक प्रतिबद्धताको आवश्यकता औँल्याएका थिए। उनीहरूले विभेदरहित, समावेशी र न्यायपूर्ण समाज निर्माण नै लोकतान्त्रिक नेपालको साझा लक्ष्य हुनुपर्नेमा जोड दिएका थिए।