दाङ l लुम्बिनी प्रदेश सरकारको मन्त्रिपरिषद् पुनर्गठन गरिएको छ । मुख्यमन्त्री चेतनारायण आचार्यको सिफारिसमा प्रदेश प्रमुख कृष्णबहादुर घर्तीमगरले सोमबार नव नियुक्त पाँच जना मन्त्रीलाई पद तथा गोपनीयताको शपथ गराएका छन् ।
नेपालको संविधानको धारा १६८ को उपधारा (९) बमोजिम मन्त्रिपरिषद् पुनर्गठन गर्दै सरकारमा नयाँ अनुहारहरूलाई जिम्मेवारी दिइएको हो । पुनर्गठित मन्त्रिपरिषद्मा नेकपा (एमाले) बाट चार जना तथा जनता समाजवादी पार्टीबाट एक जना मन्त्री समावेश भएका छन् ।
नवनियुक्त मन्त्रीहरूमा तुलसीप्रसाद चौधरी, डिल्लीराज भुसाल, रामजीप्रसाद घिमिरे, रत्नबहादुर खत्री र भण्डारीलाल अहिर रहेका छन् । उनीहरूलाई क्रमशः कृषि, भूमि व्यवस्था तथा सहकारी मन्त्रालय, ऊर्जा, जलस्रोत तथा सिँचाइ मन्त्रालय, स्वास्थ्य मन्त्रालय, भौतिक पूर्वाधार विकास मन्त्रालय तथा आन्तरिक मामिला तथा कानून मन्त्रालयको जिम्मेवारी प्रदान गरिएको छ ।
प्रदेश सरकारको यो पुनर्गठनलाई विकास निर्माण, सेवा प्रवाह र सुशासनलाई थप प्रभावकारी बनाउने उद्देश्यसँग जोडेर हेरिएको छ । नयाँ मन्त्रीहरूको आगमनसँगै प्रदेश सरकारका प्राथमिकता र कार्यसम्पादनमा नयाँ ऊर्जा थपिने अपेक्षा गरिएको छ ।
शपथ ग्रहण कार्यक्रममा मुख्यमन्त्री चेतनारायण आचार्य, पूर्वमुख्यमन्त्री जोकबहादुर महरा, सभामुख तुलाराम घर्तीमगर, उपसभामुख मेनुका खाँड केसी लगायत उच्च पदस्थ व्यक्तित्वहरूको उपस्थिति रहेको थियो ।
राजनीतिक समीकरणअनुसार गरिएको मन्त्रिपरिषद् पुनर्गठनले प्रदेश सरकारलाई थप सुदृढ, सन्तुलित र परिणाममुखी बनाउने विश्वास व्यक्त गरिएको छ। नयाँ मन्त्रीहरूलाई जिम्मेवारीसँगै जनअपेक्षा पूरा गर्ने चुनौतीसमेत थपिएको छ।
