विराटनगर । नेपाली कांग्रेसका पूर्वमहामन्त्री कृष्णप्रसाद सिटौलाले ‘नेपाल तर्सनेहरूको देश’ भएको बताएका छन् । आइतबार (जेठ ३१) मोरङको विराटनगरमा संस्थापनइतर समूहको भेलामा उनले यस्तो बताएका हुन् ।
“राष्ट्रपति नै तर्सिनुभएको छ, आन्दोलन भयो, प्रतिनिधिसभा विघटन गरिदिनुभयो, प्रधानमन्त्री नियुक्त गरिदिनुभयो, संविधानमा त्यो कल्पना छैन, तर हामी पनि डराएर मान्यौँ,” उनले भने ।
यो डराउने र तर्साउने सिलसिला कांग्रेसले रोक्ने उनले बताए । त्यही सिलसिलामा पार्टीको विशेष महाधिवेशन पनि भएको उनले उल्लेख गरे ।
उनले भने, “संविधानको फन्डामेन्टल परिवर्तन हुन सक्दैन । एउटै पार्टी कांग्रेस हो, जसले शासकले जनताको मनमा पारेको भ्रम निकाल्ने हो ।”
भय मेटाउन मनदेखि खण्डित कांग्रेसले नसक्ने उनले बताए । प्राविधिक कुरा गरेर राजनीतिमा ‘मोसन’ नआउने उनको भनाइ थियो ।
