काठमाडौँ । अमेरिकी उपराष्ट्रपति जेडी भान्स आइतबार बिहान स्विट्जरल्यान्ड पुगेका छन् । स्विट्जरल्यान्डमा अमेरिका र इरानबीच प्रत्यक्ष वार्ता सुरु हुने तयारी भइरहँदा सोही वार्तामा सहभागी हुन उनी त्यहाँ गएका हुन् ।
अमेरिकी प्रतिनिधिमन्डलको नेतृत्व भान्सले गरेका छन् । इरानी प्रतिनिधिमण्डलको नेतृत्व इरानी संसदका सभामुख मोहम्मद बाघेर गालिबाफ र विदेशमन्त्री अब्बास अराघचीले गरिरहेका छन् ।
वार्तामा पाकिस्तानका प्रधानमन्त्री शहबाज शरीफ र पाकिस्तानी सेनाका फिल्ड मार्शल आसिम मुनिर पनि सहभागी हुनेछन् । पाकिस्तानले युद्ध अवधिभर मध्यस्थकर्ताको भूमिका निर्वाह गर्दै आएको छ ।
यसैबीच इरानी सेनाले इजरायलले दक्षिणी लेबनानमा गरेको आक्रमणको प्रतिक्रियास्वरूप स्टे«ट अफ होर्मुज पुनः बन्द गरिएको दाबी गरेको छ । तर अमेरिकी सेनाले उक्त दाबी अस्वीकार गर्दै जहाजहरूको आवतजावत सामान्य रूपमा जारी रहेको जनाएको छ ।
अमेरिका र इरानबीच युद्ध अन्त्य गर्ने प्रारम्भिक सम्झौता भएपनि इजरायल र हिजबुल्लाह बीचको द्वन्द्व पूर्ण रूपमा रोकिएको छैन । शनिबार इजरायली हवाई आक्रमणमा लेबनानमा कम्तीमा ४७ जनाको मृत्यु भएको बताइएको छ ।
इजरायली रक्षा बल (आईडीएफ)ले हिजबुल्लाहसँग सम्बन्धित ८० वटा लक्ष्यमा आक्रमण गरी दर्जनौँ लडाकु मारिएको जनाएको छ । इजरायलका चार सैनिक पनि मारिएको बताइएको छ ।
अमेरिकाले सम्झौताअनुसारका प्रतिबद्धता पूरा नगरेको आरोप लगाउँदै इरानले स्टे«ट अफ होर्मुज बन्द गरिएको जनाएको छ । तर अमेरिकी सेनाको मध्य कमाण्ड (सेन्टकम) ले जहाजहरूको आवतजावत जारी रहेको र इरानले उक्त स्टे«ट नियन्त्रण नगर्ने स्पष्ट पारेको छ । एजेन्सी
