काठमाडौं । राष्ट्रिय स्वतन्त्र पार्टी (रास्वपा) ले महाधिवेशनमार्फत नयाँ नेतृत्व चयन गर्ने क्रममा विभिन्न राजनीतिक तथा सामाजिक समूहबाट समायोजन भएर आएका नेता–कार्यकर्तालाई चुनावी प्रतिस्पर्धाभन्दा बाहिरबाटै केन्द्रीय नेतृत्वमा समेट्ने रणनीति अघि सारेको छ।
पार्टीमा प्रवेश गरेको छोटो अवधिमै निर्वाचन प्रक्रियाबाट नेतृत्वमा पुग्न कठिन हुने अवस्थालाई मध्यनजर गर्दै उनीहरूलाई सभापतिको मनोनयनमार्फत केन्द्रीय समितिमा स्थान दिने तयारी गरिएको स्रोतले जनाएको छ। यही उद्देश्यका लागि रास्वपाले केन्द्रीय समितिको आकार बढाएर १५८ सदस्यीय बनाएको छ।
रास्वपामा आमनिर्वाचनअघि विभिन्न राजनीतिक तथा वैकल्पिक धारका समूहहरूबाट नेता–कार्यकर्ता समायोजन भएका थिए। बालेन समूह, विवेकशील साझा, खगेन्द्र सुनुवार नेतृत्वको समूह, थरुहट आन्दोलनसँग आबद्ध व्यक्तिहरूलगायत विभिन्न पृष्ठभूमिका व्यक्तिहरू पार्टीमा आबद्ध भएका थिए। उनीहरूमध्ये केहीले सरकार तथा संसदमा प्रतिनिधित्वको अवसर पाए पनि लामो समयदेखि पार्टीमा सक्रिय रहेर पनि जिम्मेवारी नपाएका नेता–कार्यकर्तालाई अब केन्द्रीय नेतृत्वमा ल्याउने तयारी गरिएको छ।
महाधिवेशनपूर्व बसेको केन्द्रीय समिति बैठकमा सभापति रवि लामिछानेले समायोजनबाट आएका नेता–कार्यकर्ताप्रति पार्टी जिम्मेवार रहने प्रतिबद्धता व्यक्त गरेका थिए।
उनले भनेका थिए, “तपाईंहरूको योगदान र अवस्थाबारे म पूर्ण रूपमा जानकार छु। तपाईंहरू निरन्तर पार्टीका लागि सक्रिय हुनुहुन्छ। तर भर्खरै संगठनमा आएर निर्वाचनमार्फत प्रतिस्पर्धा गर्नु सहज हुँदैन। पार्टीले यस विषयलाई उचित रूपमा सम्बोधन गर्नेछ।”
पार्टी स्रोतका अनुसार रास्वपामा आबद्ध भएर पनि हालसम्म कुनै लाभको पद वा अवसर प्राप्त नगरेका व्यक्तिहरूलाई केन्द्रीय सदस्य मनोनयनमा प्राथमिकता दिइनेछ। यसलाई समायोजन प्रक्रियालाई न्यायोचित र समावेशी बनाउने पार्टी नेतृत्वको प्रयासका रूपमा हेरिएको छ।
