लुम्बिनी, असार ८ । लुम्बिनी प्रदेशसभामा आर्थिक वर्ष २०८३/८४ को वार्षिक बजेटमाथि आजदेखि सैद्धान्तिक छलफल प्रारम्भ हुने भएको छ।
प्रदेशसभा सचिवालयका अनुसार आज बस्ने प्रदेशसभाको दशौँ बैठकमा आर्थिक वर्ष २०८३/८४ को राजस्व र व्ययको वार्षिक अनुमान (बजेट) माथि सैद्धान्तिक छलफल सञ्चालन गरिने कार्यसूची तय गरिएको छ।
बैठकमा आर्थिक मामिला तथा योजनामन्त्री धनेन्द्र कार्कीले आर्थिक वर्ष २०८३/८४ को राजस्व र व्ययको वार्षिक अनुमानमाथि सैद्धान्तिक छलफल गरियोस् भन्ने प्रस्ताव सभासमक्ष प्रस्तुत गर्नेछन्। प्रस्तावमाथिको छलफलमा प्रदेशसभा सदस्यहरूले आफ्नो धारणा राख्नेछन् भने छलफलका क्रममा उठेका जिज्ञासा तथा प्रश्नहरूको मन्त्री कार्कीले जवाफ दिने कार्यक्रम रहेको छ।
त्यसैगरी, मन्त्री कार्कीले ‘आर्थिक वर्ष २०८३/८४ को सेवा तथा कार्यका लागि प्रदेश सञ्चित कोषबाट केही रकम खर्च गर्ने र विनियोजन गर्ने सम्बन्धमा व्यवस्था गर्न बनेको विधेयक’ पनि प्रदेशसभामा प्रस्तुत गर्ने कार्यसूची रहेको सचिवालयले जनाएको छ।
प्रदेश सरकारले गत असार १ गते आगामी आर्थिक वर्षका लागि बजेट सार्वजनिक गरेको थियो। उक्त बजेटमाथिको सैद्धान्तिक छलफलसँगै विनियोजन विधेयकको प्रक्रियाले थप गति लिने अपेक्षा गरिएको छ।
