काठमाडौँ । गृहमन्त्री सुधन गुरुङले कुनै औपचारिक जानकारी नदिई भारतसँग जोडिएका बारा–पर्साका प्रमुख सीमा नाकामा आकस्मिक अनुगमन गर्दै तस्करी नियन्त्रणको वास्तविक अवस्था बुझ्ने प्रयास गरेका छन्। उनको भ्रमणबारे स्थानीय प्रशासन र सुरक्षा निकायसमेत पूर्वजानकारीविहीन रहेपछि सीमाक्षेत्रमा हलचल मच्चिएको थियो।
शुक्रबार साँझ मधेश पुगेका मन्त्री गुरुङले पर्साको जगरनाथपुर गाउँपालिका अन्तर्गतको जानकी टोला, ड्राइपोर्ट क्षेत्र तथा बाराको कलैया उपमहानगरपालिका–१० स्थित मटिअर्वा नाकाको स्थलगत निरीक्षण गरेका थिए। शनिबार सीमरा विमानस्थलबाट काठमाडौं फर्किने क्रममा मात्रै प्रमुख जिल्ला अधिकारी तथा सुरक्षा निकायका प्रमुखहरू उनीसँग भेट्न पुगेका थिए।
अनुगमनका क्रममा मन्त्री गुरुङले स्थानीय बासिन्दासँग प्रत्यक्ष संवाद गर्दै सीमाक्षेत्रको यथार्थ बुझ्न खोजे। स्थानीयले रातिको समयमा सयौँ साइकलमार्फत भन्सार छलेर सामान नेपाल भित्रिने गरेको गुनासो गरेपछि मन्त्री स्वयंले, "पालैपालो आउँछन् कि थोरै–थोरै ? अहिले पनि यस्तो भइरहेको छ ?" भन्दै वास्तविक अवस्था बुझ्न चासो देखाएका थिए।
स्थानीयले तस्करी अहिले पनि नरोकिएको दाबी गर्दै मन्त्रीलाई केहीबेर सीमा क्षेत्रमा बसेर आफ्नै आँखाले गतिविधि अवलोकन गर्न आग्रह गरेका थिए। त्यसपछि मन्त्री गुरुङले आफ्ना सहयोगीलाई थप निरीक्षण गर्न निर्देशन दिएका थिए।
उनले सीमा नाकामा जडान गरिएका सीसीटीभी प्रणालीको निगरानी कसले गर्छ भन्ने विषयमा पनि जानकारी लिएका थिए। स्थानीयका अनुसार सशस्त्र प्रहरीको बोर्डर आउटपोस्ट (बीओपी) ले सीसीटीभीमार्फत सीमाक्षेत्रको निगरानी गर्दै सबै गतिविधिको रेकर्ड राख्ने गरेको छ।
अनुगमनपछि मन्त्री गुरुङले गृह प्रशासनका अधिकारीलाई भन्सार छली तथा सबै प्रकारका तस्करी नियन्त्रणमा प्रभावकारी रूपमा लाग्न स्पष्ट निर्देशन दिएका छन्।
मन्त्री गुरुङको यो अप्रत्याशित भ्रमणलाई सीमाक्षेत्रमा लामो समयदेखि चल्दै आएको तस्करी नियन्त्रणको वास्तविक अवस्था बुझ्ने तथा सुरक्षा संयन्त्रको कार्यसम्पादन मूल्याङ्कन गर्ने प्रयासका रूपमा हेरिएको छ।
