काठमाडौं । श्रम संस्कृत पार्टीका सांसद आरेन राईले प्रधानमन्त्रीको विवादास्पद सीमा सम्बन्धी अभिव्यक्तिबारे प्रतिनिधिसभामै स्पष्ट जवाफ दिन सरकारसँग माग गरेका छन्। उनले संसदमा उठेको विषयको उत्तर सार्वजनिक कार्यक्रम वा अन्य मञ्चबाट नभई संसदमै आउनुपर्ने बताएका छन्।
आइतबार प्रतिनिधिसभाको बैठकमा बोल्दै सांसद राईले प्रधानमन्त्रीले दिएको भनिएको अभिव्यक्तिलाई संसदको अभिलेखबाट हटाउन आफूहरूले लामो समयदेखि माग गर्दै आए पनि त्यसबारे कुनै सुनुवाइ नभएको गुनासो गरे।
उनले प्रधानमन्त्रीको अभिव्यक्ति राष्ट्रहितमा थियो कि राष्ट्रघाती थियो भन्ने विषयमा सरकारले स्पष्ट धारणा सार्वजनिक गर्नुपर्ने बताए। उनका अनुसार यदि उक्त अभिव्यक्ति राष्ट्रहितमा भएको हो भने अभिलेखबाट हटाउनु आवश्यक छैन, तर राष्ट्रघाती ठहरिए संसदको रेकर्डबाट तत्काल हटाइनुपर्छ।
‘हामी प्रधानमन्त्रीको जवाफ चितवन वा कुनै सार्वजनिक कार्यक्रममा होइन, यही प्रतिनिधिसभाबाट सुन्न चाहन्छौँ,’ राईले भने, ‘संसदप्रति सरकारको जवाफदेहिता सुनिश्चित हुनुपर्छ।’
सांसद राईको भनाइसँगै प्रधानमन्त्रीको अभिव्यक्ति र त्यसको संसदीय अभिलेखलाई लिएर संसदमा नयाँ बहस चर्किएको छ।
