काठमाडौं । रुपन्देहीको तिलोत्तमा नगरपालिका–४ डिङ्गारनगरस्थित तिनाउ खोलामा आएको आकस्मिक बाढीमा फसेका एक युवकको सुरक्षाकर्मीले सकुशल उद्धार गरेका छन्।
आइतबार बिहान करिब ८:३० बजे दाउरा निकाल्ने क्रममा खोलामा पसेका गुल्मी मालिका गाउँपालिका–३ पैयुखर्कका स्थायी बासिन्दा तथा हाल बुटवल उपमहानगरपालिका–१७ रानीगञ्जमा बस्दै आएका ३१ वर्षीय गोरखबहादुर विक अचानक आएको बाढीमा फसेका थिए।
घटनाको जानकारी प्राप्त हुनासाथ इलाका प्रहरी कार्यालय बुटवल र सशस्त्र प्रहरी बल नेपाल सुरक्षा बेस बुटवलको संयुक्त उद्धार टोली घटनास्थल पुगेको थियो। सुरक्षाकर्मीको तत्काल सक्रियताका कारण विकलाई सकुशल उद्धार गर्न सफल भएको प्रहरीले जनाएको छ।
मनसुन सक्रिय भएसँगै नदी तथा खोलामा पानीको बहाव एक्कासि बढ्ने जोखिम रहेकाले प्रशासनले नदी–खोला आसपास अनावश्यक रूपमा नजान र विशेष सतर्कता अपनाउन सर्वसाधारणलाई आग्रह गरेको छ।
