काठमाडौं– नेपालमा यस वर्ष धान रोपाइँको गति गत वर्षको तुलनामा केही सुस्त देखिएको छ ।
प्राप्त पछिल्लो तथ्याङ्क अनुसार सोमबार असार २२ गतेसम्म देशभर कुल धान रोप्न योग्य क्षेत्रफलको ३२.३८ प्रतिशत मात्र रोपाइँ सम्पन्न भएको छ । गत वर्ष २०८२ सालको सोही अवधिमा देशभर ४५ प्रतिशत रोपाइँ भइसकेको थियो ।
तथ्याङ्क अनुसार नेपालभर कुल १३ लाख ७० हजार ६२ हेक्टर क्षेत्रफलमा धान खेती हुने अनुमान गरिएकोमा हालसम्म ४ लाख ४३ हजार ५९५ दशमलव ०९ हेक्टरमा मात्र रोपाइँ सकिएको छ ।
सातै प्रदेशको विवरण हेर्दा सोमबारसम्म सुदूरपश्चिम प्रदेशमा सबैभन्दा बढी ५७.९ प्रतिशत रोपाइँ भएको छ ।
त्यस्तै, गण्डकी प्रदेशमा ४१.० प्रतिशत, कर्णाली प्रदेशमा ४०.५ प्रतिशत, लुम्बिनी प्रदेशमा ३७.३ प्रतिशत, बागमती प्रदेशमा ३३.२ प्रतिशत र कोशी प्रदेश ३१.५ प्रतिशत धान रोपाईं सम्पन्न भएको छ ।
मधेश प्रदेशमा भने सबैभन्दा कम १५.६ प्रतिशत रोपाइँ भएको छ ।
गत वर्ष असार २२ गतेसम्मको तुलनामा यस वर्ष अधिकांश प्रदेशमा रोपाइँको दर घटेको देखिएको छ । गत वर्ष सोही समयमा सुदूरपश्चिममा ८२.८ प्रतिशत र कर्णालीमा ७१.७ प्रतिशत रोपाइँ भइसकेको थियो ।
यस्तै बागमती (५१.९%), गण्डकी (५५.६%) र लुम्बिनी (५२.१%) प्रदेशमा पनि गत वर्षको तुलनामा यस वर्ष रोपाइँको प्रतिशत निकै कम रहेको छ । कोशी प्रदेशमा भने गत वर्ष (२९.५%) को तुलनामा यस वर्ष (३१.५%) सामान्य सुधार देखिएको छ ।
