काठमाडौं । सन्धिखर्क नगरपालिका-५ का वडाध्यक्ष तथा नेपाली कांग्रेस अर्घाखाँचीका पूर्व जिल्ला सदस्य स्वर्गीय ऋषभ अधिकारीको स्मृतिमा नेपाली काङ्ग्रेस अर्घाखाँची-काठमाडौं सम्पर्क समितिको आयोजनामा आज काठमाडौंमा श्रद्धाञ्जली तथा शोकसभा कार्यक्रम सम्पन्न भएको छ ।
कार्यक्रममा नेपाली कांग्रेसका पूर्व केन्द्रीय सदस्य रेवती प्रसाद भुसाल, लुम्बिनी प्रदेशका सहमहामन्त्री विष्णु प्रसाद खनाल, प्रदेश सदस्यद्वय डा. जयबहादुर टन्डन र ताराप्रसाद श्रेष्ठ, नेपाली कांग्रेस अर्घाखाँचीका सभापति केशव श्रेष्ठ, नेपाली कांग्रेस लुम्बिनी प्रदेश संसदीय दलका पूर्व सचेतक निर्मला क्षेत्री लगायत विभिन्न तहका नेता-कार्यकर्ता, जनप्रतिनिधि, शुभेच्छुक तथा सर्वसाधारणको उल्लेखनीय उपस्थिति रहेको थियो"।
श्रद्धाञ्जली सभामा वक्ताहरूले स्वर्गीय अधिकारीप्रति भावपूर्ण श्रद्धाञ्जली अर्पण गर्दै पार्टी संगठन निर्माण, लोकतान्त्रिक आन्दोलनको सुदृढीकरण तथा जनप्रतिनिधिका रूपमा जनताको सेवामा उहाँले पुर्याउनुभएको योगदानको उच्च प्रशंसा बक्ताहरुले गरेका थिए । उहाँको सरल, निष्ठावान् र जनमुखी नेतृत्वले अर्घाखाँचीको राजनीतिक तथा सामाजिक जीवनमा अमिट छाप छोडेको उनीहरूको भनाइ थियो ।
कार्यक्रममा दिवंगत आत्माको चिरशान्तिको कामना गर्दै शोकसन्तप्त परिवारप्रति गहिरो समवेदना व्यक्त गरिएको थियो । सहभागीहरूले स्वर्गीय अधिकारीले स्थापित गरेका लोकतान्त्रिक मूल्य, आदर्श र जनसेवाको भावनालाई निरन्तर अघि बढाउने प्रतिबद्धतासमेत व्यक्त गरेका थिए ।
सन्धिखर्क नगरपालिका-५ का वडाध्यक्ष तथा नेपाली कांग्रेस अर्घाखाँचीका पूर्व जिल्ला सदस्य ऋषभ अधिकारीको २०८३ साल असार ३० गते ७० वर्षको उमेरमा त्रिभुवन विश्वविद्यालय शिक्षण अस्पताल, महाराजगञ्जमा उपचारका क्रममा निधन भएको थियो । उहाँका दुई श्रीमती, एक छोरा र एक छोरी रहेका छन् ।
स्वर्गीय अधिकारीको निधनले नेपाली कांग्रेस अर्घाखाँची मात्र होइन, समग्र जिल्लाले एक इमानदार, कर्मशील र जनप्रिय राजनीतिक व्यक्तित्व गुमाएको भन्दै श्रद्धाञ्जली सभामा उपस्थित सबैले उहाँप्रति उच्च सम्मान व्यक्त गरेका थिए ।
