काठमाडौं । पूर्वप्रधानमन्त्री तथा नेपाल कम्युनिस्ट पार्टी (एकीकृत समाजवादी) का वरिष्ठ नेता झलनाथ खनाल साताव्यापी औपचारिक भ्रमणका लागि बिहीबार जनवादी गणतन्त्र चीन प्रस्थान गरेका छन्। चिनियाँ कम्युनिस्ट पार्टी (सीपीसी) को मैत्रीपूर्ण निमन्त्रणामा उनी चीन भ्रमणमा गएका हुन्।
खनालको सचिवालयका अनुसार भ्रमणका क्रममा उनले चिनियाँ कम्युनिस्ट पार्टी (सीपीसी) का उच्च नेतृत्वसँग शिष्टाचार तथा औपचारिक भेटवार्ता गर्ने कार्यक्रम रहेको छ। भेटघाटमा नेपाल–चीन सम्बन्धका समसामयिक विषय, द्विपक्षीय सहयोग तथा क्षेत्रीय सहकार्यका विविध पक्षमा विस्तृत छलफल हुने जनाइएको छ।
भ्रमणका क्रममा दुई देशबीचको परम्परागत मित्रता, राजनीतिक विश्वास, आर्थिक साझेदारी, पूर्वाधार विकास, व्यापार, लगानी तथा जनस्तरको सम्बन्ध थप सुदृढ बनाउने विषय मा समेत विचार आदानप्रदान हुने अपेक्षा गरिएको छ।
खनालको यो भ्रमणलाई नेपाल–चीन सम्बन्धलाई थप सुदृढ बनाउने कूटनीतिक अवसरका रूपमा हेरिएको छ। साथै, दुई देशबीच पारस्परिक हितका क्षेत्रमा सहयोग विस्तार गर्ने विषय पनि भ्रमणको प्रमुख एजेन्डामा रहने सचिवालयले जनाएको छ।
