सिरहा । गुडिरहेको मोटरसाइकलको पछाडि उभिएर भिडियो बनाएको दृश्य सामाजिक सञ्जालमा भाइरल भएपछि राष्ट्रिय स्वतन्त्र पार्टी (रास्वपा) का सांसद बब्लु गुप्ता ट्राफिक कारबाहीमा परेका छन्। ट्राफिक नियम उल्लंघन गरेको ठहर गर्दै जिल्ला ट्राफिक प्रहरी कार्यालय, लहानले उनलाई ५ सय रुपैयाँ जरिबाना गरेको हो।
सिरहा–१ बाट निर्वाचित सांसद गुप्ता आफैं जिल्ला ट्राफिक प्रहरी कार्यालय पुगेर जरिबाना बुझाएका हुन्। सार्वजनिक सडकमा जोखिमपूर्ण शैलीमा मोटरसाइकल यात्रा गरेको भिडियो भाइरल बनेपछि उनको व्यापक आलोचना भएको थियो।
घटनापछि सांसद गुप्ताले सामाजिक सञ्जाल फेसबुकमार्फत सार्वजनिक रूपमा क्षमायाचना गर्दै रमाइलो गर्ने क्रममा आफूबाट गल्ती भएको स्वीकार गरेका छन्। उनले आफ्नो व्यवहारले गलत सन्देश गएको भन्दै आगामी दिनमा ट्राफिक नियमको पूर्ण पालना गर्ने र यस्ता गल्ती पुनः नदोहोर्याउने प्रतिबद्धता व्यक्त गरेका छन्।
सार्वजनिक पदमा रहेका व्यक्तिहरूले कानुनको पालना गर्दै नागरिकका लागि उदाहरणीय व्यवहार प्रस्तुत गर्नुपर्ने चर्चा भइरहेका बेला ट्राफिक प्रहरीले नियम उल्लंघनमा कसैलाई पनि छुट नदिने सन्देश दिएको छ।
