कपिलवस्तु । कपिलवस्तुमा शनिबार राति भएको दर्दनाक सडक दुर्घटनामा मोटरसाइकलमा सवार दुई युवाको ज्यान गएको छ। तौलिहवा–भैरहवा सडकखण्डअन्तर्गत शुद्धोधन गाउँपालिका–६ स्थित बिमिहा चोक नजिक बसले मोटरसाइकललाई ठक्कर दिँदा दुवै जनाको मृत्यु भएको हो।
जिल्ला प्रहरी कार्यालय कपिलवस्तुका अनुसार तौलिहवाबाट भैरहवातर्फ जाँदै गरेको भे १ ख ४५५२ नम्बरको बसले विपरीत दिशाबाट आइरहेको लु प्र ०१–००४ प ३८५६ नम्बरको मोटरसाइकललाई ठक्कर दिएको थियो। ठक्करपछि मोटरसाइकलमा सवार दुवै जना गम्भीर घाइते भएका थिए।
दुर्घटनामा यशोधरा गाउँपालिका–२, पश्चिम भडेहर निवासी ३० वर्षीय रामबहादुर चाइ र २८ वर्षीय सर्जु चाइ गम्भीर घाइते भएका थिए। उनीहरूलाई तत्काल उपचारका लागि कपिलवस्तु अस्पताल, तौलिहवा पुर्याइए पनि उपचारकै क्रममा चिकित्सकले मृत घोषणा गरेका प्रहरीले जनाएको छ।
घटनापछि बस चालकलाई प्रहरीले नियन्त्रणमा लिएको छ। दुर्घटनाको कारण खुलाउन घटनास्थलको अनुसन्धानका साथै आवश्यक कानुनी प्रक्रिया अघि बढाइएको जिल्ला प्रहरी कार्यालय कपिलवस्तुले जनाएको छ।
यस दुर्घटनाले फेरि एकपटक तौलिहवा–भैरहवा सडकखण्डको सवारी सुरक्षा र सडक अनुशासनप्रति गम्भीर प्रश्न उठाएको छ। प्रहरीले सवारी चालकलाई गति नियन्त्रणमा राख्न, ट्राफिक नियमको पूर्ण पालना गर्न तथा विशेष गरी रातिको समयमा उच्च सतर्कता अपनाउन आग्रह गरेको छ।
