काठमाडौं । चिकित्सक तथा स्वास्थ्यकर्मीहरूले आज आकस्मिकबाहेकका सेवा स्थगित गर्ने घोषणा गरेपछि स्वास्थ्य तथा खाद्य स्वच्छता मन्त्रालयले स्वास्थ्य सेवामा कुनै पनि प्रकारको अवरोध नगर्न सबै अस्पताल, चिकित्सक र स्वास्थ्यकर्मीलाई आग्रह गरेको छ।
मन्त्रालयका सहप्रवक्ता डा. समिरकुमार अधिकारीद्वारा जारी विज्ञप्तिमा स्वास्थ्य सेवा नागरिकको जीवनसँग प्रत्यक्ष जोडिएको अत्यन्त संवेदनशील, जीवनरक्षक तथा अत्यावश्यक सेवा भएकाले उपचार सेवामा कुनै अवरोध आउन नदिन अपिल गरिएको छ। मन्त्रालयले चिकित्सक पेसाको गरिमा, सामाजिक उत्तरदायित्व तथा नागरिकको स्वास्थ्य अधिकारलाई आत्मसात् गर्दै सबै अस्पतालले निर्वाध रूपमा स्वास्थ्य सेवा सञ्चालन गर्नुपर्नेमा जोड दिएको छ।
विज्ञप्तिमा नागरिकले सहज रूपमा स्वास्थ्य सेवा प्राप्त गर्ने अधिकारको संरक्षण गर्नु राज्यको दायित्व भएको उल्लेख गर्दै चिकित्सक तथा स्वास्थ्यकर्मीले पनि सुरक्षित, सम्मानजनक र भयमुक्त वातावरणमा सेवा प्रदान गर्न पाउने अधिकार सुनिश्चित हुनुपर्ने बताइएको छ। मन्त्रालयले स्वास्थ्यकर्मीको सुरक्षा र नागरिकको उपचार अधिकार दुवै समान रूपमा महत्वपूर्ण रहेको स्पष्ट पारेको छ।
यसैबीच मन्त्रालयले पछिल्ला दिनमा चिकित्सक, स्वास्थ्यकर्मी तथा स्वास्थ्य संस्थामाथि भएका कुटपिट र दुर्व्यवहारका घटनाप्रति गम्भीर ध्यानाकर्षण भएको जनाएको छ। यस्ता घटनामा संलग्न व्यक्तिहरूलाई कानुनी दायरामा ल्याई कडा कारबाही गरिने प्रतिबद्धता पनि विज्ञप्तिमार्फत व्यक्त गरिएको छ।
गत शनिबार वीरगञ्जस्थित नारायणी अस्पतालमा कार्यरत चिकित्सक तथा स्वास्थ्यकर्मीमाथि भएको आक्रमणको विरोध गर्दै नेपाल चिकित्सक संघले स्वास्थ्यकर्मीको सुरक्षा सुनिश्चित गर्न माग गर्दै आज आकस्मिकबाहेकका सेवा बन्द गर्ने निर्णय गरेको हो। यस घटनापछि देशभर स्वास्थ्यकर्मीको सुरक्षालाई लिएर बहस चुलिएको छ भने मन्त्रालयले सेवा अवरुद्ध नगरी समस्या समाधानका लागि सबै पक्षलाई संयमता अपनाउन आग्रह गरेको छ।
