काठमाडौँ । मुलुकमा विकसित पछिल्ला राजनीतिक, सामाजिक तथा सुरक्षा सम्बन्धी घटनाक्रमका बीच सभामुख डोलप्रसाद अर्याल र प्रमुख प्रतिपक्षी दल नेपाली कांग्रेसका संसदीय दलका नेता भीष्मराज आङ्देम्बेबीच मंगलबार सिंहदरबारमा महत्त्वपूर्ण भेटवार्ता भएको छ। भेटमा संसद्को आगामी भूमिका, शान्ति–सुरक्षाको अवस्था, प्राकृतिक विपद् तथा जनसरोकारका समसामयिक विषयमा विस्तृत छलफल भएको छ।
सभामुखको कार्यकक्षमा भएको भेटका क्रममा नेता आङ्देम्बेले सुनसरीको देवानगञ्जमा भएको हिंसात्मक घटनाप्रति सभामुखको गम्भीर ध्यानाकर्षण गराउँदै मुलुकमा शान्ति–सुरक्षाको अवस्था चुनौतीपूर्ण बन्दै गएको बताएका छन्। उनले अमनचयन कायम गर्न सरकारलाई प्रभावकारी कदम चाल्न संसद्ले आवश्यक भूमिका खेल्नुपर्ने आवश्यकता औँल्याएका छन्।
भेटमा हालै पाँचथरसहित देशका विभिन्न जिल्लामा आएको बाढी र पहिरोका कारण प्रभावित नागरिकको अवस्था पनि प्रमुख रूपमा उठाइएको थियो। नेता आङ्देम्बेले विपद्पीडितको तत्काल उद्धार, राहत वितरण तथा पुनर्स्थापनाको कार्यलाई सरकारले उच्च प्राथमिकतामा राख्नुपर्ने र संसद्ले पनि त्यसमा प्रभावकारी सहजीकरण गर्नुपर्ने धारणा राखेका छन्।
त्यसैगरी वीरगञ्जस्थित नारायणी अस्पतालका चिकित्सकमाथि भएको दुर्व्यवहार र त्यसपछि देशभर देखिएको स्वास्थ्यकर्मी आन्दोलनबारे पनि प्रतिपक्षी दलले सभामुखको ध्यानाकर्षण गराएको छ। स्वास्थ्यकर्मीको सुरक्षा सुनिश्चित गर्दै नागरिकले सहज रूपमा उपचार सेवा पाउने वातावरण निर्माण गर्न सरकार गम्भीर हुनुपर्नेमा जोड दिइएको बताइएको छ।
समसामयिक राष्ट्रिय मुद्दाहरूमा केन्द्रित यो भेटवार्तालाई संसद्को आगामी कार्यसूची, शान्ति–सुरक्षाको अवस्था तथा विपद् व्यवस्थापनका विषयमा प्रतिपक्षको धारणा सभामुखसमक्ष औपचारिक रूपमा प्रस्तुत गरिएको महत्वपूर्ण राजनीतिक संवादका रूपमा हेरिएको छ।
