काठमाडौं । यातायात व्यवस्था विभागले म्याद सकिन एक वर्षभन्दा कम समय बाँकी रहेका सवारी चालक अनुमतिपत्र (लाइसेन्स) भएका चालकलाई तत्काल नवीकरण प्रक्रिया पूरा गर्न आग्रह गरेको छ। विभागले नयाँ व्यवस्थाअनुसार नवीकरणपछि चालकलाई १० वर्ष अवधिको नयाँ लाइसेन्स उपलब्ध गराइने जनाएको छ।
विभागले जारी गरेको सूचनामा म्याद सकिन एक वर्षभन्दा कम अवधि बाँकी रहेका पुराना लाइसेन्स हाल छपाइ नगरिने भएकाले समयमै नवीकरण गरी नयाँ अवधिको लाइसेन्स लिन उपयुक्त हुने उल्लेख गरिएको छ। यसले सेवाग्राहीलाई लामो समयसम्म पुनः नवीकरणको झन्झटबाट मुक्त हुने विभागको विश्वास छ।
यस्तै, विभागले विगत चार वर्षदेखि विभिन्न कारणले रोकिएको लाइसेन्स छपाइ कार्य पूर्ण रूपमा सम्पन्न भएको जानकारी दिएको छ। विभागका अनुसार गत असार मसान्तसम्मका सबै पुराना आवेदनको लाइसेन्स छापिसकिएको छ भने साउन ७ गतेसम्म २७ लाख ४७ हजारभन्दा बढी लाइसेन्स देशभरका विभिन्न यातायात व्यवस्था कार्यालयमा वितरणका लागि पठाइसकिएको छ।
सुरक्षण मुद्रण केन्द्रसँग नयाँ सम्झौता भएपछि लाइसेन्स छपाइ तथा वितरण प्रक्रिया तीव्र गतिमा अघि बढेको विभागले जनाएको छ। विभागले सम्बन्धित सेवाग्राहीलाई आफ्नो लाइसेन्सको अवस्था सम्बन्धित कार्यालयबाट बुझेर आवश्यक प्रक्रिया पूरा गर्न तथा समयमै नवीकरण गर्न समेत आग्रह गरेको छ।
