काठमाडौं । नेपाली कांग्रेसकी प्रमुख सचेतक बासना थापाले सुनसरीमा भएको घटनामा एक युवाको ज्यान गएको विषयमा सरकारलाई जिम्मेवार ठहर गर्दै संसदमा घटनाबारे स्पष्ट जवाफ दिन माग गरेकी छन्।
प्रतिनिधिसभाको बैठकमा बोल्दै थापाले सुनसरी घटनाको वास्तविकता संसदमार्फत सार्वजनिक गर्न सरकारसँग आग्रह गरिन्। उनले नागरिकको ज्यान जानेजस्तो गम्भीर घटनामा सरकार मौन बस्न नहुने भन्दै जिम्मेवारीबाट पन्छिन खोजेको आरोप लगाइन्।
थापाले काठमाडौं महानगरपालिकाका तत्कालीन मेयर बालेन्द्र शाहले यसअघि सामाजिक सञ्जालमा लेखेको स्टाटस स्मरण गर्दै सत्ता बाहिर हुँदा र सत्तामा पुगेपछि नागरिकको मृत्यु हेर्ने दृष्टिकोण किन फरक भएको भन्दै प्रश्नसमेत उठाइन्।
उनले सुनसरी घटनामा सरकारको भूमिकामाथि गम्भीर प्रश्न उठाउँदै विशेषगरी प्रधानमन्त्री संवादहीन बनेको टिप्पणी गरिन्। घटनाबारे सरकारको आधिकारिक धारणा सार्वजनिक गरी संसदलाई जानकारी गराउन उनले जोडदार माग गरिन्।
