काठमाडौं । नेपाल प्रज्ञा प्रतिष्ठानको कुलपतिमा साहित्यकार कुमार नगरकोटी नियुक्त भएका छन्। प्रधानमन्त्री बालेन्द्र शाहले साउन २० गते संस्कृति, पर्यटन तथा नागरिक उड्डयनमन्त्रीको अध्यक्षतामा गठित सिफारिस समितिको सिफारिसका आधारमा नगरकोटीलाई कुलपतिमा नियुक्त गरेका हुन्।
संस्कृति, पर्यटन तथा नागरिक उड्डयन मन्त्रालयले शुक्रबार सार्वजनिक गरेको सूचनाअनुसार नेपाल प्रज्ञा प्रतिष्ठान, नेपाल ललितकला प्रज्ञा प्रतिष्ठान तथा नेपाल संगीत तथा नाट्य प्रज्ञा प्रतिष्ठानका कुलपति, उपकुलपति, सदस्य–सचिव तथा परिषद् सदस्यहरू नियुक्त गरिएको हो।
नेपाल प्रज्ञा प्रतिष्ठानको उपकुलपतिमा पर्वतका अविनाश श्रेष्ठ र सदस्य–सचिवमा रुपन्देहीका रोशन शेरचन नियुक्त भएका छन्।
त्यस्तै, परिषद् सदस्यमा काठमाडौंकी प्रतिसरा मानन्धर, दाङका कृष्णराज चौधरी, तेह्रथुमकी सीता सुब्बा, कास्कीका तीर्थबहादुर गुरुङ, सिराहाकी रूपा कुमारी, दाङका नवीन नेपाली, काभ्रेका दीपक सापकोटा र सुर्खेतका दुर्गाबहादुर घर्ती नियुक्त भएका छन्।
नेपाल ललितकला प्रज्ञा प्रतिष्ठानको कुलपतिमा एरिना ताम्राकार नियुक्त भएकी छन्। उपकुलपतिमा ललितपुरका चन्द्रश्याम डंगोल तथा सदस्य–सचिवमा दोलखाका कैलाशकुमार श्रेष्ठ नियुक्त भएका छन्।
ललितकला प्रज्ञा प्रतिष्ठानको परिषद् सदस्यमा काठमाडौंका जुपिटर प्रधान, झापाका कुबीर देवान, ललितपुरकी सङ्गी श्रेष्ठ, बाँकेका धुवराज शर्मा, सिराहाका ओमप्रकाश यादव र ललितपुरकी बिना पौड्याल नियुक्त भएका छन्।
यसैगरी, नेपाल संगीत तथा नाट्य प्रज्ञा प्रतिष्ठानको कुलपतिमा ब्रजेश खनाल नियुक्त भएका छन्। उपकुलपतिमा झुमा वनेम र सदस्य–सचिवमा भुपेन्द्र सिंह रायमाझी नियुक्त भएका छन्।
संगीत तथा नाट्य प्रज्ञा प्रतिष्ठानको परिषद् सदस्यमा छेन्देको हाङ राई, जितबहादुर देउजा, सुबिमा श्रेष्ठ, सरस्वती चौधरी, राजन मुकारुङ र रेखा शाह गुरुङ नियुक्त भएका छन्।
मन्त्रालयले सार्वजनिक गरेको सूचनासँगै प्रज्ञा प्रतिष्ठानका तीनै निकायमा नयाँ नेतृत्व र परिषद् गठन भएको हो।
