काठमाडौं । नेपाली कांग्रेसले भदौ ११ गते महिला उद्यमशीलता सम्मेलन गर्ने भएको छ।
केन्द्रीय नीति, अनुसन्धान तथा प्रशिक्षण प्रतिष्ठानको बैठकले पार्टी केन्द्रीय कार्यालय परिसरमा महिला उद्यमशीलता सम्मेलन आयोजना गर्ने निर्णय गरेको का.वा. मुख्य सचिव कृष्णप्रसाद दुलालले बताए।
सम्मेलनमा स्टार्टअप तथा साना तथा मझौला उद्यममा संलग्न महिला उद्यमीहरूको सहभागिता रहने उनले बताए। महिला उद्यमीलाई एउटै साझा मञ्चमा ल्याएर अनुभव आदानप्रदान, लगानीकर्तासँग भेटघाट, सरकारी निकायसँग समन्वय, नयाँ बजारको खोजी तथा प्रेरणादायी वातावरण निर्माण गर्ने उद्देश्यले सम्मेलन आयोजना गर्न लागिएको प्रतिष्ठानले जनाएको छ।
बीपी स्मृति दिवसका अवसरमा गत साउन ६ गते आयोजना गरिएको ग्रीन रन प्रतियोगिताअन्तर्गत महिला दौड भदौ ६ गते पुनः सञ्चालन गर्ने निर्णय बैठकले गरेको छ।
प्राविधिक कारणले उक्त दिन महिला दौडको विजेता घोषणा गर्न नसकिएकाले पुनः दौड आयोजना गर्न लागिएको हो। यसमा यसअघि दर्ता भएका सहभागीका अतिरिक्त नयाँ इच्छुक महिलालाई समेत सहभागी गराइनेछ।
बैठकले प्रतिष्ठानका सदस्य राकेश सिंहको संयोजकत्वमा समुदाय पहुँच उपसमिति गठन गरेको छ। उक्त उपसमितिको सहजीकरण कांग्रेस केन्द्रीय सदस्य डा. अमिता प्रधानले गर्ने निर्णय गरेको छ।
प्रतिष्ठानको अर्को बैठक भदौ पहिलो साता बस्ने मुख्यसचिव दुलालले बताए।
