काठमाडौं । कास्कीमा बाढीले दुईवटा पुल बगाएको छ । गएराति २ः१५ बजे बाढीले कास्की र पर्वत जोड्ने दुईवटा मेटल पुल बगाएको हो । मन्दिरमा तीनजना फसेका छन् । उनीहरूको उद्धार प्रयास जारी छ ।
अन्नपूर्ण गाउँपालिका ५ र ६ को सिमाना नयाँ पुल–बिरेठाँटी सडकखण्डको छेउमा मोदीखोलाको बीचमा रहेको अन्नपूर्ण माता मन्दिरमा रहेको दुईवटा मेटलको पुल बाढीले बगाएको प्रहरीले बताएको छ ।
मन्दिरको आधा भाग बाढीले बगाएको छ । मन्दिरमा रहेका एक पुजारी र दुई भक्तजन मन्दिरमा फसेका छन् । सशस्त्र प्रहरीले उनीहरूको उद्धारको प्रयास गरिरहेको छ ।
सशस्त्र प्रहरी बल नेपाल नं. २४ कालिका गण कास्कीबाट चारजना रोप रेस्क्यू र तीनजना गोताखोरसहितको उद्धार टोली घटनास्थल पुगेको डीएसपी शैलेन्द्र थापाले जानकारी दिए ।
