काठमाडौं । नेपाल प्रेस युनियनको १०औँ संघीय महाधिवेशन आगामी असोज १७ र १८ गते काठमाडौंमा हुने भएको छ। महाधिवेशनको मिति र स्थान तय भएसँगै युनियनले नयाँ नेतृत्व चयनका लागि निर्वाचन प्रक्रिया समेत अघि बढाएको छ।
नेपाल प्रेस युनियनका अध्यक्ष शिव लम्सालको अध्यक्षतामा साउन ३१ गते बसेको केन्द्रीय सचिवालय बैठकले महाधिवेशन काठमाडौंमा आयोजना गर्ने निर्णय गरेको हो। बैठकले महाधिवेशनलाई व्यवस्थित र निष्पक्ष रूपमा सम्पन्न गर्न विधानबमोजिम पाँच सदस्यीय निर्वाचन समिति समेत गठन गरेको छ।
युनियनको विधान-२०४८ (सातौँ संशोधन २०८३) को धारा ४६ बमोजिम वरिष्ठ पत्रकार तेज प्रकाश पण्डितको संयोजकत्वमा निर्वाचन समिति गठन गरिएको महासचिव दिलीप पौडेलद्वारा जारी विज्ञप्तिमा उल्लेख छ।
निर्वाचन समितिको सदस्यमा अधिवक्ताहरू बाबुराम अर्याल, राजकुमार उप्रेती, प्रदीप सत्याल तथा पत्रकार बिमला तुम्खेवा रहेका छन्।
बैठकले समितिलाई विधानअनुसार महाधिवेशनको निर्वाचन प्रक्रिया अघि बढाउँदै आवश्यक सम्पूर्ण प्रक्रिया पूरा गरी निर्वाचन सम्पन्न गर्ने जिम्मेवारी दिएको छ।
महाधिवेशनको तयारीस्वरूप युनियनका देशभरका शाखाहरूको अधिवेशन प्रक्रिया अघि बढाउने निर्णय यसअघि नै भइसकेको छ। शाखा अधिवेशन सम्पन्न भएपछि संघीय महाधिवेशनमार्फत नयाँ नेतृत्व चयन हुने भएकाले आगामी महाधिवेशनलाई युनियनभित्र नेतृत्व परिवर्तन र संगठनात्मक पुनर्संरचनाको महत्वपूर्ण अवसरका रूपमा हेरिएको छ।
महाधिवेशनले प्रेस तथा अभिव्यक्ति स्वतन्त्रताको संरक्षण, श्रमजीवी पत्रकारको हकहित, पत्रकारिता क्षेत्रका समसामयिक चुनौती तथा संगठनको आगामी कार्यदिशाबारे समेत छलफल गर्ने अपेक्षा गरिएको छ।
