काठमाडौं । नेपाल स्वास्थ्य अनुसन्धान परिषद् (एनएचआरसी) को सदस्यसचिवमा डा. प्रमोद जोशी नियुक्त भएका छन्। नियुक्तिसँगै उनले शुक्रबार स्वास्थ्य तथा खाद्य स्वच्छता मन्त्री निशा मेहतासमक्ष पद तथा गोपनीयताको शपथ ग्रहण गरेका छन्।
चिकित्सा तथा स्वास्थ्य अनुसन्धानको क्षेत्रमा लामो अनुभव हासिल गरेका डा. जोशी यसअघि पनि नेपाल स्वास्थ्य अनुसन्धान परिषद्मा महत्वपूर्ण जिम्मेवारीमा रहिसकेका छन्। उनले सन् २०२४ देखि २०२६ सम्म परिषद्को कार्यकारी सदस्यसचिवका रूपमा जिम्मेवारी सम्हालेका थिए।
नयाँ जिम्मेवारीसँगै डा. जोशीले स्वास्थ्य अनुसन्धानलाई थप प्रभावकारी बनाउने, अनुसन्धानका क्षेत्रमा संस्थागत क्षमता अभिवृद्धि गर्ने तथा स्वास्थ्य नीतिनिर्माणमा अनुसन्धानको भूमिका बलियो बनाउने चुनौती सामना गर्नुपर्नेछ।
डा. जोशीले सन् २००० मा युक्रेनस्थित ओडेसा स्टेट मेडिकल युनिभर्सिटीबाट एमबीबीएस गरेका हुन्। त्यसपछि उनले सन् २००९ मा नेशनल एकेडेमी अफ मेडिकल साइन्सेस (न्याम्स) बाट अर्थोपेडिक्स तथा ट्रमा विषयमा एमएस पूरा गरेका छन्।
त्यसैगरी उनले भारतको इन्द्रप्रस्थ अपोलो अस्पतालबाट आर्थ्रोप्लास्टी तथा आर्थ्रोस्कोपीमा फेलोसिपसमेत गरेका छन्। हाडजोर्नी तथा ट्रमा उपचारको क्षेत्रमा विशेषज्ञता हासिल गरेका जोशीले चिकित्सा सेवासँगै स्वास्थ्य अनुसन्धान र व्यवस्थापनको क्षेत्रमा पनि अनुभव बटुलेका छन्।
परिषद्को सदस्यसचिवका रूपमा उनको नियुक्तिलाई स्वास्थ्य अनुसन्धानको क्षेत्रमा निरन्तरता र अनुभवलाई प्राथमिकता दिने निर्णयका रूपमा हेरिएको छ। नेपालमा स्वास्थ्यसम्बन्धी नीति, कार्यक्रम तथा उपचार प्रणालीलाई तथ्य र प्रमाणमा आधारित बनाउन स्वास्थ्य अनुसन्धानको भूमिका महत्वपूर्ण हुँदै गएकाले परिषद्को नेतृत्वमा उनको जिम्मेवारी पनि चुनौतीपूर्ण रहनेछ।
अब डा. जोशीको नेतृत्वमा परिषद्ले राष्ट्रिय स्वास्थ्य प्राथमिकतासँग जोडिएका अनुसन्धानलाई अघि बढाउने, अनुसन्धानको गुणस्तर सुधार गर्ने तथा अनुसन्धानका निष्कर्षलाई स्वास्थ्य नीति र व्यवहारमा जोड्ने दिशामा कस्तो भूमिका खेल्छ भन्ने चासोको विषय बनेको छ।
