काठमाडौं । राष्ट्रिय स्वतन्त्र पार्टी (रास्वपा) को केन्द्रीय समितिको बैठक केहीबेरमा सुरु हुँदैछ। बैठकमा सहभागी हुन पार्टीका केन्द्रीय नेताहरू वनस्थलीस्थित घण्टी घरमा पुग्ने क्रम जारी छ।
पार्टी सभापति रवि लामिछानेसहित विभिन्न नेताहरू भने बैठकस्थल घण्टी घर पुगिसकेका छन्। अन्य केन्द्रीय सदस्य तथा नेताहरू पनि बैठकमा सहभागी हुन आउने क्रम जारी रहेको बताइएको छ।
रास्वपाका महामन्त्री विपिनकुमार आचार्यका अनुसार आजको बैठकमा पार्टीका महत्वपूर्ण दस्तावेजमाथि छलफल हुनेछ। त्यस्तै, संगठन व्यवस्थापन, विभिन्न पदमा मनोनयन तथा पार्टीको आगामी योजना र कार्यक्रमबारे पनि बैठकमा छलफल गर्ने कार्यसूची रहेको छ।
बैठकमा पार्टीले सञ्चालन गर्ने आगामी अभियानका विषयमा समेत छलफल हुने बताइएको छ। संगठनलाई थप व्यवस्थित बनाउनेदेखि आगामी राजनीतिक गतिविधि र पार्टीका कार्यक्रमलाई प्रभावकारी बनाउने विषयमा बैठक केन्द्रित हुने देखिएको छ।
पछिल्लो समय पार्टीको संगठन विस्तार, आन्तरिक व्यवस्थापन र आगामी राजनीतिक रणनीतिलाई लिएर रास्वपाभित्र छलफल तीव्र भइरहेका बेला बस्न लागेको केन्द्रीय समिति बैठकलाई अर्थपूर्ण रूपमा हेरिएको छ।
विशेषगरी पार्टीका दस्तावेज, संगठनात्मक संरचना, मनोनयन र आगामी अभियानसम्बन्धी निर्णयले रास्वपाको आगामी राजनीतिक गतिविधिको दिशा तय गर्ने अपेक्षा गरिएको छ। बैठकबाट पार्टीको संगठन र कार्यक्रम सञ्चालनसम्बन्धी केही महत्वपूर्ण निर्णय आउन सक्ने नेताहरूले बताएका छन्।
