काठमाडौं । नेपाल सरकारको स्वामित्वमा रहेको दुग्ध विकास संस्थान (डीडीसी) ले उत्पादन गर्दै आएको घिउ अब दुबईमा पनि पाइने भएको छ। नेपाली उत्पादनलाई विदेशमा विस्तार गर्ने क्रममा डीडीसीले शुक्रबारदेखि दुबईमा घिउ निर्यात सुरु गरेको हो।
दुबईमा रहेका नेपालीलाई लक्षित गर्दै पहिलो चरणमा शुक्रबार ६ सय किलो डीडीसीको घिउ जहाजमार्फत पठाइँदै छ। विदेशमा रहेका नेपाली समुदायमाझ स्वदेशी उत्पादनको पहुँच विस्तार गर्ने उद्देश्यले डीडीसीले दुबईमा घिउ बिक्री सुरु गरेको जनाएको छ।
दुबईमा घिउ निर्यातका लागि डीडीसीले रातो र चन्द्र–सूर्य इन्टरनेसनलसँग सम्झौता गरेको छ। सम्झौताअनुसार दुबईमा रहेका बिक्रेताले प्रारम्भिक चरणमा घिउको परीक्षण बिक्री गर्नेछन्। बजारमा माग र उपभोक्ताको प्रतिक्रिया हेरेर आगामी दिनमा निर्यातको मात्रा बढाइने डीडीसीका प्रबन्ध निर्देशक प्रकाशचन्द्र घिमिरेले बताए।
परीक्षण निर्यातपछि नियमित आपूर्तिको तयारी
डीडीसीले पहिलोपटक नेपाली उत्पादनको प्रचार र बजार परीक्षणका लागि हवाई मार्गबाट घिउ पठाएको हो। प्रारम्भिक परीक्षण सफल भएमा नियमित रूपमा ठूलो परिमाणमा घिउ निर्यात गर्ने तयारी गरिएको छ।
महँगो हवाई ढुवानीको विकल्पमा आगामी दिनमा भारत हुँदै कन्टेनरमार्फत दुबईमा घिउ पठाउने योजना डीडीसीको छ। यसबाट ढुवानी लागत घटाएर प्रतिस्पर्धी मूल्यमा नेपाली घिउ उपलब्ध गराउन सकिने अपेक्षा गरिएको छ।
डीडीसीले विदेशमा रहेका नेपाली समुदायलाई लक्षित गर्दै आफ्नो बजार विस्तार गर्ने रणनीति अघि सारेको छ। विशेषगरी नेपाली स्वाद र स्वदेशी उत्पादनप्रति आकर्षण रहेका बजारमा डीडीसीका दुग्धजन्य उत्पादन पुर्याउने तयारी भइरहेको संस्थानले जनाएको छ।
मध्यपूर्वका अन्य देशमा पनि विस्तार गर्ने योजना
डीडीसीले दुबईमा मात्र सीमित नरहेर मध्यपूर्वका अन्य देशमा समेत आफ्ना उत्पादनको बजार विस्तार गर्ने योजना बनाएको छ। प्रबन्ध निर्देशक घिमिरेका अनुसार घिउसँगै डीडीसीका अन्य दुग्धजन्य उत्पादनसमेत आगामी दिनमा मध्यपूर्वका विभिन्न मुलुकमा निर्यात तथा बिक्री गर्ने तयारी भइरहेको छ।
नेपालमा उत्पादन भएको दुग्धजन्य वस्तुले अन्तर्राष्ट्रिय बजारमा प्रवेश पाउनुलाई स्वदेशी उत्पादनको प्रवर्द्धनका दृष्टिले महत्वपूर्ण मानिएको छ। दुबईमा सुरु भएको यो निर्यातले आगामी दिनमा नेपाली दुग्ध उत्पादनका लागि थप अन्तर्राष्ट्रिय बजारको ढोका खोल्ने अपेक्षा गरिएको छ।
पहिलो चरणको ६ सय किलो घिउको बजार परीक्षणबाट प्राप्त प्रतिक्रिया र मागका आधारमा निर्यातको मात्रा तथा अन्य उत्पादनको विस्तारबारे निर्णय गरिने डीडीसीले जनाएको छ।
