काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेको प्रस्तावित चीन भ्रमण तत्कालका लागि स्थगित भएको छ। यसअघि अगस्ट दोस्रो साताका लागि तय गरिएको भ्रमण करिब एक महिना पछि सारिए पनि अब सेप्टेम्बर दोस्रो सातामा समेत भ्रमण नहुने भएको स्रोतले जनाएको छ।
उच्च स्रोतका अनुसार लामिछानेको चीन भ्रमणको नयाँ मिति अहिलेसम्म तय भएको छैन। यसअघि भारत भ्रमणपछि चीन जाने तयारी भए पनि निर्धारित समयमा भ्रमण हुन नसकेपछि अहिलेका लागि उनको चीन भ्रमण अनिश्चित बनेको हो।
तर लामिछानेको चीन भ्रमण पूर्ण रूपमा रद्द भने नभएको सरकारी स्रोतको भनाइ छ। दुवै पक्षलाई अनुकूल हुने समय तय भएपछि भविष्यमा नयाँ मिति घोषणा गरेर भ्रमण हुन सक्ने सम्भावना कायमै रहेको बताइएको छ।
यसैबीच, लामिछानेको भ्रमण स्थगित भए पनि रास्वपाका सांसदहरूको टोली भने चीन जाने तयारीमा रहेको स्रोतले जनाएको छ। सांसदहरूको भ्रमणको विस्तृत कार्यक्रम भने सार्वजनिक भइसकेको छैन।
वाग्ले भारत जाने तयारीमा
रास्वपा उपसभापति तथा अर्थमन्त्री स्वर्णिम वाग्ले भने छिट्टै भारत भ्रमणमा जाने तयारीमा छन्। भ्रमणका क्रममा उनले भारतीय पक्षका उच्च तहका अधिकारीहरूसँग भेटवार्ता गर्ने तयारी रहेको स्रोतले जनाएको छ।
एकातिर पार्टी सभापति लामिछानेको चीन भ्रमण स्थगित हुनु र अर्कोतर्फ अर्थमन्त्री वाग्लेको भारत भ्रमणको तयारी हुनुलाई रास्वपाको पछिल्लो अन्तर्राष्ट्रिय राजनीतिक तथा कूटनीतिक सक्रियतासँग जोडेर हेरिएको छ।
अब लामिछानेको चीन भ्रमणका लागि नयाँ मिति कहिले तय हुन्छ र रास्वपाका सांसदहरूको चीन भ्रमणले कस्तो राजनीतिक तथा कूटनीतिक सन्देश दिन्छ भन्ने विषयमा चासो बढेको छ।
