काठमाडौं । अख्तियार दुरुपयोग अनुसन्धान आयोगमा तीन सहसचिवको सरुवा भएको छ। आयोगमा सरुवा हुनेमा प्रशासन सेवातर्फका गोविन्दप्रसाद अधिकारी र सुनिता नेपाल तथा इन्जिनियरिङ सेवातर्फका रामहरि पोखरेल रहेका छन्।
चिकित्सा विज्ञान राष्ट्रिय प्रतिष्ठान (न्याम्स), वीर अस्पतालमा फाजिलमा रहेका सहसचिव गोविन्दप्रसाद अधिकारीलाई अख्तियारमा पठाइएको हो। त्यस्तै, लगानी बोर्डको कार्यालयमा कार्यरत सहसचिव सुनिता नेपालको पनि अख्तियार सरुवा भएको छ।
नेपालको सरुवासँगै लगानी बोर्डमा गण्डकी प्रदेशबाट सरुवा भएका सहसचिव ऋषिराज आचार्यले जिम्मेवारी सम्हाल्ने बाटो खुलेको छ। आचार्यको लगानी बोर्डमा सरुवा भए पनि दरबन्दी नभएका कारण उनी जिम्मेवारीविहीन अवस्थामा थिए।
यसैगरी, पूर्वाधार विकास मन्त्रालयका सहसचिव रामहरि पोखरेललाई पनि अख्तियार पठाइएको छ। अख्तियारका निमित्त सचिवसमेत रहेका प्राविधिक सहसचिव पद्यकुमार मैनालीलाई पूर्वाधार विकास मन्त्रालयमा सरुवा गरी उनको स्थानमा पोखरेललाई पठाइएको हो।
तीन कार्यालय प्रमुख पनि फेरिए
अख्तियारका बर्दिबास, पोखरा र कञ्चनपुर कार्यालयका प्रमुखको समेत सरुवा भएको छ।
बर्दिबास कार्यालय प्रमुख रामबहादुर कुरुम्बाङको कर्णाली प्रदेशमा सरुवा भएको छ। त्यस्तै, पोखरा कार्यालय प्रमुख नारायणप्रसाद रेग्मी राष्ट्रिय योजना आयोगमा सरुवा भएका छन्।
कञ्चनपुर कार्यालय प्रमुख वेदप्रसाद भण्डारीको अर्थ मन्त्रालय वा अन्तर्गत सरुवा भएको छ।
नयाँ सरुवासँगै अख्तियारमा एक सहसचिवको दरबन्दी भने कम भएको छ। आयोगमा एकैपटक तीन सहसचिव भित्रिएसँगै कार्यालय प्रमुख तथा उच्च तहका कर्मचारीको जिम्मेवारीसमेत पुनःव्यवस्थित हुने भएको छ।
