काठमाडौँ । रसुवाको भोटेकोशी हुँदै आएको भीषण बाढीले नुवाकोटका नदी तटीय क्षेत्रमा ठूलो क्षति पुर्याएपछि प्रधानमन्त्री बालेन्द्र शाह आफैँ प्रभावित क्षेत्रको स्थलगत निरीक्षणमा पुगेका छन्। प्रधानमन्त्री शाहले बाढीबाट अत्यधिक प्रभावित विदुर नगरपालिका तथा आसपासका क्षेत्र पुगेर क्षतिको प्रत्यक्ष अवलोकन गरेका हुन्।
पूर्वाधार विकासमन्त्री सुनिल लम्सालसहित प्रधानमन्त्री शाह आज बिहान ९:३० बजे सडकमार्ग हुँदै नुवाकोट पुगेका थिए। प्रभावित क्षेत्रमा पुगेर उनले बाढीका कारण क्षतिग्रस्त बस्ती, सडक तथा अन्य भौतिक पूर्वाधारको अवस्था निरीक्षण गरेका थिए।
बाढीले नदी तटीय क्षेत्रमा व्यापक क्षति पुर्याएपछि प्रधानमन्त्री शाहले उद्धार तथा राहत कार्यलाई प्रभावकारी बनाउन उच्चस्तरीय बैठक गर्दै सम्बन्धित निकायलाई आवश्यक निर्देशन दिँदै आएका थिए। त्यसैको निरन्तरतास्वरूप उनले आज प्रभावित क्षेत्रमै पुगेर स्थानीय अवस्था र क्षतिको वास्तविक जानकारी लिएका हुन्।
स्थानीय प्रशासनसँग प्रत्यक्ष छलफल
स्थलगत निरीक्षणका क्रममा प्रधानमन्त्री शाहको टोलीले स्थानीय प्रशासन, सुरक्षा निकाय तथा जनप्रतिनिधिसँग विस्तृत छलफल गरेको थियो। छलफलमा बाढीबाट भएको क्षति, प्रभावित नागरिकको अवस्था, उद्धार तथा राहतको प्रगति र तत्काल गर्नुपर्ने कामबारे जानकारी लिइएको थियो।
प्रधानमन्त्री शाहले बाढीका कारण विस्थापित भएका परिवारलाई तत्काल राहत उपलब्ध गराउन निर्देशन दिएका छन्। साथै, अवरुद्ध सडक तथा क्षतिग्रस्त पूर्वाधारलाई यथाशीघ्र सञ्चालनमा ल्याउन र प्रभावित क्षेत्रमा आवश्यक सेवा पुनःस्थापना गर्न सम्बन्धित निकायलाई निर्देशन दिएका हुन्।
‘तत्काल राहतदेखि दीर्घकालीन पुनर्स्थापनासम्म’
प्रधानमन्त्री शाहले विपद्को तत्कालीन व्यवस्थापनसँगै दीर्घकालीन पुनर्स्थापनालाई समेत प्राथमिकतामा राख्न निर्देशन दिएका छन्। बाढीबाट घर, सडक तथा अन्य संरचनामा पुगेको क्षतिको मूल्याङ्कन गरी पुनर्निर्माण र पुनर्स्थापनाको कामलाई तीव्रता दिन उनले सम्बन्धित निकायलाई आग्रह गरेका छन्।
यसैबीच, प्रभावित क्षेत्रमा उद्धार तथा राहतका लागि सुरक्षा निकाय र स्थानीय संयन्त्र परिचालन भइरहेका छन्। बाढीपछि विस्थापित नागरिकलाई सुरक्षित स्थानमा व्यवस्थापन गर्ने, आवश्यक खाद्यान्न तथा अन्य राहत सामग्री उपलब्ध गराउने र अवरुद्ध यातायात सञ्चालनमा ल्याउने कामलाई प्राथमिकतामा राखिएको छ।
बाढी प्रभावितको अवस्था बुझ्न स्थलगत रूपमै पुगेका प्रधानमन्त्री शाहले तत्काल राहत, पूर्वाधार पुनः सञ्चालन र दीर्घकालीन पुनर्स्थापनालाई सँगसँगै अघि बढाउन निर्देशन दिएका छन्।
निरीक्षण तथा आवश्यक निर्देशनपछि प्रधानमन्त्री शाहसहितको टोली आजै सडकमार्ग हुँदै काठमाडौँ फर्किएको छ।
