पश्चिम नवलपरासी l पश्चिम नवलपरासी क्षेत्र नम्बर १ का प्रतिनिधिसभा सदस्य विक्रम खनालले बाढी प्रभावित सुस्ता क्षेत्रको स्थलगत अवलोकन तथा निरीक्षण गर्नुभएको छ।
हालै आएको बाढीका कारण प्रभावित सुस्ता पुग्नुभएका सांसद खनालले स्थानीय बासिन्दा, नेपाल प्रहरी, सशस्त्र प्रहरी बल तथा स्थानीय सुरक्षा निकायका पदाधिकारीसँग छुट्टाछुट्टै तथा संयुक्त रूपमा छलफल गर्नुभएको हो।

स्थलगत निरीक्षणका क्रममा उहाँले बाढीपछि सुस्तावासीले भोगिरहेका समस्या, जोखिम तथा दैनिक जनजीवनमा परेको कठिनाइबारे स्थानीयसँग प्रत्यक्ष जानकारी लिनुभयो। साथै, सुरक्षाकर्मीहरूसँग क्षेत्रको वर्तमान शान्ति-सुरक्षाको अवस्था, उद्धार तथा सम्भावित राहत व्यवस्थापनबारे समेत छलफल गर्नुभयो।

छलफलपछि सांसद खनालले सुस्तावासीका तत्कालीन तथा दीर्घकालीन समस्या समाधानका लागि सम्बन्धित निकाय र नेपाल सरकारको ध्यानाकर्षण गराउँदै आवश्यक समन्वय गर्ने प्रतिबद्धता व्यक्त गर्नुभयो।
उहाँले भन्नुभयो, “यस कठिन परिस्थितिमा सुस्तावासीको सुरक्षा, उद्धार र सम्भावित राहत व्यवस्थापन नै हाम्रो मुख्य प्राथमिकता हो। स्थानीयको समस्या समाधानका लागि म सम्बन्धित निकायसँग निरन्तर संवाद र समन्वयमा रहनेछु।”

स्थलगत अवलोकनका क्रममा स्थानीयवासीले सुस्ता क्षेत्रमा सुरक्षा व्यवस्था थप प्रभावकारी बनाउन, उद्धार तथा राहतलाई व्यवस्थित गर्न र बाढीका कारण प्रभावित जनजीवनलाई तत्काल सहज बनाउन राज्यका तर्फबाट आवश्यक कदम चाल्न माग गरेका थिए।

सांसद खनालको स्थलगत निरीक्षणलाई बाढी प्रभावित सुस्तावासीका समस्या प्रत्यक्ष रूपमा बुझेर सरकार तथा सम्बन्धित निकायसम्म पुर्‍याउने पहलका रूपमा हेरिएको छ।