काठमाडौं । जोखिमपूर्ण तथा चुनौतीपूर्ण परिस्थितिबीच नेपाली सेनाले टनेलभित्र फसेका ३५० जना मजदुर तथा स्थानीयको सफलतापूर्वक उद्धार गरेको छ। टनेलभित्र अझै पनि १०० जनाभन्दा बढी मानिस फसेको जनाउँदै उनीहरूलाई सुरक्षित बाहिर निकाल्न सेनाको टोली निरन्तर उद्धार अभियानमा जुटिरहेको छ।
प्रधानमन्त्रीको सचिवालयका अनुसार टनेलभित्रको जटिल अवस्था र जोखिमलाई बेवास्ता गर्दै नम्बर १ सेकेन्ड मुभमेन्ट ट्याक्टिकल हेडक्वार्टर (त्रिशुली) बाट जमदार भक्तजन बस्नेतको कमाण्डमा १/३ को सैन्य टोली अहोरात्र उद्धार कार्यमा खटिएको छ।
उद्धारका क्रममा सेनाको टोलीले टनेलभित्र फसेका व्यक्तिहरूलाई सुरक्षित स्थानमा पुर्याउनुका साथै जोखिमयुक्त क्षेत्रमा रहेका नागरिकको खोजी तथा स्थानान्तरणलाई तीव्रता दिएको छ।
सेनाले स्याफ्रुवेशी, टिमुरे, मैलुङ, ठूलो हाकु र हाकुवेशी लगायत विभिन्न स्थानबाट थप ५३३ जना नागरिकलाई सुरक्षित स्थानमा सारेको प्रधानमन्त्रीको सचिवालयले जनाएको छ।
टनेलभित्रको अवस्था जटिल र जोखिमपूर्ण रहेकाले उद्धार कार्यलाई उच्च सतर्कताका साथ अघि बढाइएको छ। उद्धारमा खटिएका सुरक्षाकर्मीले फसेका व्यक्तिहरूको अवस्थाबारे निरन्तर जानकारी लिँदै सुरक्षित रूपमा बाहिर निकाल्ने प्रयास गरिरहेका छन्।
यस घटनामा ठूलो संख्यामा मानिस जोखिममा परेपछि नेपाली सेनासहित सुरक्षा निकायका टोलीहरू उद्धार तथा राहत कार्यमा केन्द्रित भएका छन्। ३५० जनाको सफल उद्धारसँगै अझै फसेका १०० भन्दा बढी व्यक्तिको उद्धार अहिलेको मुख्य प्राथमिकता बनेको छ।
सेनाको निरन्तर प्रयासका कारण हालसम्म ठूलो संख्यामा नागरिकलाई सुरक्षित स्थानमा सार्न सफल भएको छ भने बाँकी व्यक्तिको उद्धारका लागि पनि अभियानलाई तीव्र पारिएको छ।
